اخبار جهان

پېښور – د خېبرپښتونخوا لوړپوړو ملکي او پوځي چارواکو په پېښور کې د امنیتي همغږۍ پر پیاوړتیا هوکړه وکړه

اشتراک گذاری:

بریانیوز (چهارشنبه، ۲۲ دلو ۱۴۰۴)

پېښور – د خېبرپښتونخوا ایالت لوړپوړو ملکي او پوځي چارواکو په پېښور کې په یوې مهمې امنیتي ناستې کې د ترهګرۍ ضد عملیاتو لپاره د ګډې تګلارې پر پلي کېدو او د امنیتي همغږۍ پر زیاتوالي ټینګار کړی دی

دا غونډه د پېښور قول اردو په مرکز کې ترسره شوې چې پکې د خېبرپښتونخوا وزیر اعلی سهیل اپرېدي، د پاکستان د کورنیو چارو وزیر محسن نقوي، او د پوځ او ملکي ادارو یو شمېر لوړپوړي چارواکي ګډون درلود

چارواکو ویلي، په وروستیو اوونیو کې په دې ایالت کې پوځي عملیات زیات شوي او د امنیتي وضعیت د ښه کېدو لپاره به یو منظم او ګډ ستراتېژیک چوکاټ عملي شي

مهم ټکي:

◾️ ناسته د پېښور قول اردو کې ترسره شوه او پکې ملکي او پوځي مشران ګډون درلود

◾️ چارواکو د ترهګرۍ ضد عملیاتو کې د ګډې ستراتېژۍ او نږدې همغږۍ پر اړتیا ټینګار وکړ

◾️ په وروستیو اوونیو کې په خېبرپښتونخوا کې پوځي عملیات چټک شوي دي

◾️ د امنیتي وضعیت ترڅنګ د بشري وضعیت په اړه هم اندېښنې زیاتې شوې دي

بل لور ته، د پښتون ژغورنې غورځنګ مشر منظور احمد پشتین مخکې ویلي وو چې که څه هم حکومت دا عملیات هدفمند بولي، خو په وینا یې، تر ټولو زیات زیان عامو پښتنو ته رسېدلی دی

د راپورونو له مخې، یوازې د تیراه له سیمې شاوخوا ۷۰ زره کسان بې‌ځایه شوي دي، چې دا چاره د روانو عملیاتو بشري اغېزې لا روښانه کوي. د بې‌ځایه شویو کسانو لپاره د سرپناه، خوراکي توکو او روغتیايي خدماتو اړتیاوې هم جدي بلل کېږي

تر اوسه حکومت د دې عملیاتو د پای نېټې یا دقیقو پایلو په اړه رسمي معلومات نه دي خپاره کړي، خو ټینګار یې کړی چې هدف یې د سیمې امنیت ټینګول او د وسله‌ والو ډلو ځپنه ده