په پاکستان کې د نښتې پر مهال يو طالب جنګيالی ووژل شو

اشتراک گذاری:

ځايي سرچينو خبر ورکړی چې يو طالب جنګيالی د پاکستان په خاوره کې له پاکستاني پوځیانو سره په نښته کې وژل شوی دی.

بریانیوز( سه‌شنبه، ٢٨ دلو ١٤٠٤)

سرچينو د دلو په ۲۸مه، سه‌شنبه، بریانیوز ته ويلي چې وژل شوی کس نعمان نومېده او د سرپل ولايت د سانچارک ولسوالۍ اوسېدونکی و. د معلوماتو له مخې، هغه له څه مودې راهيسې د طالبانو ترڅنګ په پاکستان کې فعاليت درلود او تېره شپه د پاکستاني ځواکونو له لوري ووژل شو.

راپورونه ښيي چې دغه پېښه د «ټي‌ټي‌پي» ترڅنګ د طالب جنګياليو د حضور نښه ګڼل کېږي. تر دې وړاندې پاکستاني چارواکو ادعا کړې وه چې ځينې وسله‌والې ډلې د افغانستان له خاورې د پاکستان پر ضد بريدونه ترسره کوي، خو طالبانو دا تورونه تل رد کړي دي.

د افغانستان لپاره د پاکستان ځانګړي استازي محمد صادق هم ويلي چې په اسلام‌اباد کې يې د روسيې له سفير سره په افغانستان کې د فعالو ورانکارو ډلو په اړه خبرې کړې دي. همداراز، د افغانستان لپاره د پاکستان پخواني ځانګړي استازي اصف دراني ټينګار کړی چې د ترهګرو ډلو شتون له پامه غورځول نه يوازې د افغانستان په ګټه نه دي، بلکې د نړيوالو اندېښنې زياتوي او د هېواد د لا زياتې انزوا سبب ګرځي.