سیاست

ایران: د جګړې د پای لپاره چمتو یو، خو تضمینونه ضروري دي

اشتراک گذاری:

بریانیوز:(چهار شنبه،۱۲ حمل۱۴۰۵)

مسعود پزشکیان، د ایران ولسمشر، ویلي چې هېواد یې د اسرائیل او امریکا سره د روانې جګړې د پای ته رسولو لپاره چمتو دی، خو دا به یوازې هغه وخت ممکن وي چې د راتلونکو شخړو د مخنیوي لپاره باوري تضمینونه ورکړل شي

نوموړي د سې‌شنبې په ورځ په خپلو څرګندونو کې ټینګار وکړ چې ایران د سولې مخالف نه دی، خو داسې هوکړه نه مني چې لنډمهاله وي او وروسته بیا تاوتریخوالی بېرته راژوندی کړي. د هغه په وینا، هر ډول تړون باید دوامداره وي او د دواړو لورو ترمنځ د باور فضا رامنځته کړي

پزشکیان زیاته کړه چې ایران به د فشارونو تر اغېز لاندې پرېکړه ونه کړي او د خپل ملي امنیت او ګټو په چوکاټ کې به ګامونه پورته کوي. هغه همدارنګه پر نړیوالو لورو غږ وکړ چې د ثبات او سولې لپاره عملي اقدامات وکړي

سیاسي شنونکي وايي، د ایران دا دریځ ښيي چې د خبرو اترو احتمال لا هم شته، خو د باور نشتوالی او امنیتي اندېښنې د هر ډول احتمالي هوکړې پر وړاندې لوی خنډونه دي

دا څرګندونې په داسې حال کې کېږي چې په سیمه کې تاوتریخوالی لا هم دوام لري او د جګړې د پراخېدو په اړه اندېښنې زیاتې شوې دي