کابل – خونړي سیلابونه؛ د افغانستان روغتیا او زده‌کړه تر سخت ګواښ لاندې

اشتراک گذاری:

بریانیوز(شنبه، ۱۲ ثور ۱۴۰۵)

د د ملګرو ملتونو د بشري مرستو د همغږۍ دفتر (اوچا) راپور ورکوي چې وروستیو سختو سیلابونو د افغانستان په بېلابېلو ولایتونو کې پراخ زیانونه اړولي دي

د معلوماتو له مخې، په ننګرهار، کندهار، زابل، لوګر او بادغیس کې لږ تر لږه ۶۱ روغتیايي مرکزونه زیانمن شوي دي

د راپور له مخې، دا طبیعي ناورین یوازې روغتیايي سکتور نه، بلکې د زده‌کړو برخه هم سخته ځپلې ده. سلګونه ښوونځي ویجاړ شوي او زرګونه زده‌کوونکي له زده‌کړو بې‌برخې شوي، چې د هغوی تعلیمي راتلونکی له جدي خطر سره مخ کړی دی

اوچا وایي، په دغو پېښو کې تر ۲۱۴ ډېر کسان خپل ژوند له لاسه ورکړی او شاوخوا ۷۵۰۰ کورونه په بشپړه یا جزوي توګه ویجاړ شوي دي. دا شمېرې د بشري ناورین ژورتیا په ډاګه کوي

همدارنګه، د مرستو رسولو بهیر له جدي ستونزو سره مخ دی. د بودیجې کمښت او د سړکونو ویجاړېدل د مرستندویه ادارو لپاره لوی خنډونه بلل شوي، چې له امله یې زیانمنو سیمو ته د عاجلو مرستو رسېدل ستونزمن شوي دي

کارپوهان خبرداری ورکوي چې که ژر تر ژره نړیواله مرسته او همغږي زیاته نه شي، نو دا وضعیت به د عامې روغتیا، تعلیم او ټولنیز ثبات پر وړاندې اوږدمهاله منفي اغېزې ولري