کابل : افغانستان ته د راستنېدونکو سیلاب: یوازې په دوو اوونیو کې ۱۲۷ زره کډوال بېرته ستانه شول

اشتراک گذاری:

بریانیوز(شنبه، ۱۲ ثور ۱۴۰۵)

د د کډوالۍ نړیوال سازمان د تازه راپور له مخې، د روان کال د اپرېل میاشتې په دویمه نیمایي کې شاوخوا ۱۲۷ زره افغان کډوال له ایران او پاکستان څخه بېرته افغانستان ته راستانه شوي دي

راپور ښيي چې د راستنېدونکو په شمېر کې دا چټک زیاتوالی په سیمه کې د اقتصادي ستونزو، د استوګنې محدودیتونو او د مهاجرتي تګلارو د بدلونونو له امله رامنځته شوی دی. ډېری دغه کډوال په داسې حال کې خپل هېواد ته ستنېږي چې له جدي اقتصادي او بشري ننګونو سره مخ دي

د کډوالۍ نړیوال سازمان خبرداری ورکړی چې د دومره لوی شمېر راستنېدونکو جذب او ملاتړ د افغانستان د اوسني وضعیت لپاره یو ستر ازمېښت دی. دغه بنسټ ټینګار کړی چې راستنېدونکي بیړنیو بشري مرستو، سرپناه، روغتیايي خدمتونو او د کار فرصتونو ته سخته اړتیا لري

په راپور کې همدارنګه راغلي چې د راستنېدونکو له ډلې ډېری یې ښځې او ماشومان دي، چې دا چاره د مرستو د رسولو اړتیا لا ډېروي. د سرحدي سیمو په ځانګړې توګه د لنډمهاله استوګنې ځایونو کې د امکاناتو کمښت هم د اندېښنې وړ بلل شوی دی

شنونکي وایي، که نړیواله ټولنه او مرستندویه ادارې ژر اقدام ونه کړي، نو دا وضعیت کولای شي د بشري کړکېچ کچه لا لوړه کړي او د ټولنیزو ستونزو سبب شي