سیاست

د واشنګټن او برلین اړیکې ترینګلې شوې: د سرتېرو ایستل او سیاسي ناندرۍ

اشتراک گذاری:

بریانیوز(شنبه، ۱۲ ثور ۱۴۰۵)

د ایالات متحده او جرمني ترمنځ ډیپلوماټیکې اړیکې وروسته له هغې ترینګلې شوې چې د امریکا ولسمشر دونالد ټرمپ له جرمني څخه د شاوخوا ۵۰۰۰ امریکايي سرتېرو د ایستلو پرېکړه اعلان کړه

دا پرېکړه د جرمني د لومړي وزیر فریدریش میرڅ د هغو څرګندونو په غبرګون کې شوې چې پکې یې پر امریکا نیوکه کړې وه. میرڅ ویلي وو چې واشنګټن د ایران له روان کړکېچ څخه د وتلو روښانه ستراتیژي نه لري او حتی د ایران له لوري په خبرو اترو کې “سپک” شوی دی

د امریکا د دفاع وزارت پنټاګون د جرمني دا څرګندونې “د منلو نه وړ” بللي او ټینګار یې کړی چې ټرمپ حق لري د هغو متحدینو پر وړاندې اقدام وکړي چې د امریکا له تګلارو سره همغږي نه ښيي، په ځانګړي ډول د ایران په اړه

جرمني دا مهال په خپله خاوره کې نږدې ۳۵ زره امریکايي پوځیان ځای پر ځای کړي، چې دا د دواړو هېوادونو ترمنځ د اوږدمهالو امنیتي همکاریو یوه مهمه برخه بلل کېږي. خو ټرمپ خبرداری ورکړی چې که متحدین یې د امریکا دریځ ته پام ونه کړي، نو دا ډول اقدامات به نورو اروپايي هېوادونو لکه اسپانیا او ایټالیا ته هم وغځول شي

سیاسي شنونکي باور لري چې دا کړکېچ کولای شي د ناټو په چوکاټ کې د لوېدیځو متحدینو ترمنځ یو نوی درز رامنځته کړي، او د نړیوالو سیاسي ائتلافونو پر راتلونکې اغېز وکړي