سمیع یوسفزی: بقا په بدل کې د هېواد پلور؟ د افغانستان کانونه د طالبانو د عوایدو تور بازار

اشتراک گذاری:

ازاد خبریال او شنونکی سمیع یوسفزی وايي، د وروستیو څېړنو له مخې په افغانستان کې کانونه د طالبانو لپاره د عاید له مهمو پاتې سرچینو څخه ګڼل کېږي.

بریانیوز( سه‌شنبه، ١٥ ثور ١٤٠٥)

یوسفزی، څرګندوي چې ډېری هغه شرکتونه چې په ظاهر کې د غیر طالب یا بهرنیو، په ځانګړي ډول چینایي شرکتونو په نوم فعالیت کوي، تر شا یې د طالبانو د مشرانو او یا هم د بهرنیو شرکتونو سره د شراکت او ګټو اړیکې موجودې دي.

هغه زیاتوي، که څه هم د افغانستان پخوانیو حکومتونو – له داکتر نجیب الله څخه نیولې تر حامد کرزي او اشرف غني پورې – قانوناً دا حق درلود چې خپلې طبیعي زیرمې وپلوري، خو په نړیواله کچه معمول دا دی چې هېوادونه خپلې طبیعي شتمنۍ د ستراتیژیکو زیرمو په توګه ساتي او یوازې هغه وخت یې کاروي یا خرڅوي چې له جدي اقتصادي فشار سره مخ شي.

د یوسفزي په وینا، دا حالت د یوه بې‌وزله انسان مثال لري چې د سخت ضرورت پر مهال د خپلې کورنۍ زر او ګاڼې پلوري.

هغه همدارنګه ټینګار کوي چې افغانستان اوس مهال له جدي اقتصادي ستونزو سره مخ دی، او همدا لامل دی چې کانونه او طبیعي زیرمې د طالبانو لپاره د عوایدو د بقا وروستۍ وسیله ګرځېدلې ده.

د نوموړي په وینا، د کانونو په قراردادونو کې د کمېشن، فیصدۍ، رشوت، او حتی د ځانګړو کسانو مدرسو ته د پیسو ورکولو، زکات او خیرات ورکولو موارد هم شامل دي، چې دا چارې په یو ډول “ضروري دود” بدل شوي دي.