جرمني: د مجرم افغان اتباعو د اخراج دوام به په منظم او سختو اصولو سره روان وي

جرمني: د مجرم افغان اتباعو د اخراج دوام به په منظم او سختو اصولو سره روان وي

بریانیوز| سه‌شنبه، ۱۵ ثور ۱۴۰۵

جرمد آلمان د کورنیو چارو وزیر، الکساندر دوبرینت، په خپلو تازه څرګندونو کې ویلي چې د هغو افغان اتباعو د اخراج بهیر چې په جرمي کړنو کې ښکېل شوي، به له آلمان څخه افغانستان ته په دوامدار، منظم او قانوني چوکاټ کې روان پاتې شي

دوبرینت ټینګار کړی چې د آلمان حکومت د کورني امنیت د ساتنې، د قانون د حاکمیت د پیاوړتیا او د ټولنیز نظم د ثبات لپاره جدي او نه شاته کېدونکي اقدامات ترسره کوي. د هغه په وینا، هغه کسان چې د جرمونو له امله د عامه امنیت لپاره خطر ګڼل کېږي، باید د قانون له مخې له هېواد څخه وایستل شي، څو د ټولنې د خوندي فضا ساتنه تضمین شي

هغه زیاته کړې چې دا پالیسي تصادفي نه ده، بلکې د اوږدمهاله قانوني او اداري تګلارې یوه برخه ده چې هدف یې د مهاجرتي نظام شفافیت او د جرمونو پر وړاندې بې‌ساري سخت دریځ دی. د جرمني حکومت وایي چې هر اخراج به د بشپړو حقوقي پروسو، عدلي ارزونو او انساني معیارونو په رڼا کې ترسره کېږي

دوبرینت دا هم ویلي چې د اروپا په کچه د مهاجرتي سیاستونو بدلونونه د دې اړتیا رامنځته کړې چې هېوادونه د خپلو امنیتي جوړښتونو د پیاوړتیا لپاره لا سخت اقدامات عملي کړي، څو د ټولنې ثبات او د خلکو اعتماد وساتل شي

شنونکي باور لري چې دا ډول پرېکړې د اروپا د مهاجرتي سیاستونو د سختېدو څرګند انعکاس دی، په ځانګړې توګه په هغو هېوادونو کې چې د امنیتي اندېښنو او سیاسي فشارونو له امله د کډوالو پر سیاستونو بیاکتنه کوي

په همدې حال کې، د بشري حقونو ځینې بنسټونه ټینګار کوي چې دا ډول اقدامات باید د نړیوالو قوانینو او انساني اصولو په چوکاټ کې ترسره شي، څو د عدالت او بشري کرامت توازن وساتل شي او هېڅ بې‌ګناه کس له زیان سره مخ نه شي