د واشنګټن مهمې لیدنې؛ قطر او امریکا د سیمه‌ییز امنیت او ستراتیژیکو همکاریو د پراختیا پر نوې مرحلې سلا شول

د واشنګټن مهمې لیدنې؛ قطر او امریکا د سیمه‌ییز امنیت او ستراتیژیکو همکاریو د پراختیا پر نوې مرحلې سلا شول

     بریانیوز( پنجشنبه، ١۷ ثور ١٤٠٥)

د قطر او امریکا ترمنځ د ستراتیژیکو اړیکو د لا پیاوړتیا په موخه، د قطر د بهرنیو چارو وزارت اعلان کړی چې د بهرنیو چارو په وزارت کې د دولت وزیر، محمد بن عبدالعزیز ال خلیفي، د امریکا پلازمېنه واشنګټن کې له امریکایي لوړپوړو چارواکو سبېسټان ګورکا او پال کاپور سره جلا جلا لیدنې ترسره کړې دي

د قطر بهرنیو چارو وزارت د اېکس له لارې په خپره کړې خبرپاڼه کې ویلي، چې په دغو مهمو کتنو کې د دواړو هېوادونو ترمنځ د ستراتیژیکو همکاریو پر پراختیا، د منځني ختیځ او افریقا د وروستیو سیاسي او امنیتي تحولاتو، او د ترهګرۍ پر ضد د ګډو هڅو د پیاوړتیا په اړه هر اړخیزې خبرې شوې دي

دواړو لورو ټینګار کړی چې د سیمه‌ییز امنیت، اقتصادي ثبات او نړیوالې سولې لپاره ګډ کار او همغږي حیاتي ارزښت لري. د خبرو پر مهال د هغو ننګونو ارزونه هم شوې چې دا مهال سیمه ورسره مخ ده، په ځانګړي ډول د امنیتي ګواښونو، افراطي ډلو د فعالیتونو او جیوپولیټیکي بدلونونو په تړاو

محمد بن عبدالعزیز ال خلیفي ویلي، قطر هڅه کوي چې د متوازن سیاست او فعالې ډیپلوماسۍ له لارې د سیمې د ثبات او د نړیوالو همکاریو د پراختیا لپاره رغنده رول ولوبوي. نوموړي د امریکا له لوري د امنیتي او سیاسي همکاریو پر دوام هم مثبت ټینګار کړی دی

بل لور ته امریکایي چارواکو هم د قطر رول مهم بللی او ویلي یې دي چې دوحه په سیمه کې د منځګړیتوب، سولې راوستلو او د نړیوال امنیت د پیاوړتیا په برخه کې یو اغېزناک شریک پاتې شوی دی

شنونکي باور لري چې د قطر او امریکا ترمنځ د اړیکو پراختیا به نه یوازې د دواړو هېوادونو ترمنځ ستراتیژیک باور نور هم قوي کړي، بلکې د منځني ختیځ او افریقا په مهمو امنیتي او سیاسي قضیو کې به د ګډو دریځونو د همغږۍ سبب هم شي