مشهد کې د افغان کډوالو د ستونزو د حل لپاره ګډه غونډه شوې

اشتراک گذاری:

بریا نیوز (شنبه،۱۹ثور ۱۴۰۵)

د مشهد ښار کې د افغانستان د سیاسي استازولۍ او د ملګرو ملتونو د کډوالو عالي کمېشنري ترمنځ د افغان کډوالو د ستونزو د ارزونې او حل په موخه ګډه غونډه ترسره شوې ده

د افغانستان د کډوالو او راستنېدونکو چارو وزارت په خپره شوې خبرپاڼه کې ویلي، په دې غونډه کې د افغان کډوالو له ګڼو مهمو ستونزو سره تړلې موضوعګانې مطرح شوې. په دغو موضوعاتو کې د “امایش” کارټ د غځولو لوړ لګښتونه، د بېوزلو کورنیو او ځانګړو ناروغانو ستونزې، د زده‌کوونکو د زده کړو وضعیت، او همداراز د کډوالو قانوني او اداري ننګونې شاملې وې

د خبرپاڼې له مخې، ګډونوالو ټینګار کړی چې په ایران کې مېشت افغان کډوال له اقتصادي فشارونو او ګڼو اداري محدودیتونو سره مخ دي او اړتیا ده چې د هغوی ستونزو ته جدي پاملرنه وشي

بلخوا، د ملګرو ملتونو د کډوالو عالي کمېشنرۍ مسوولانو ژمنه کړې چې یادې ستونزې به د شته اصولو، قوانینو او امکاناتو په چوکاټ کې تعقیب او د حل لپاره به یې لازمې هڅې وکړي

شنونکي وایي، په ایران کې د میلیونونو افغان کډوالو شتون د بشري، اقتصادي او ټولنیزو ستونزو یوه ستره موضوع ګرځېدلې، او د اسنادو، روغتیا، زده کړو او قانوني خوندیتوب برخو کې لا هم ګڼې ننګونې موجودې دي