د ارومچي د خبرو دوام؛ د اسلامي امارت او چین ترمنځ د اړیکو او سیمه‌ ییز امنیت په اړهپراخې خبرې شوې

د ارومچي د خبرو دوام؛ د اسلامي امارت او چین ترمنځ د اړیکو او سیمه‌ ییز امنیت په اړه پراخې خبرې شوې 

  بریا نیوز (سه شنبه،۲۲ثور ۱۴۰۵)

د اسلامي امارت د بهرنیو چارو وزیر امیرخان متقي د چین د بهرنیو چارو وزارت له ځانګړي استازي د افغانستان لپاره یو شیاوینګ سره په مهمه کتنه کې د ارومچي د مذاکراتو د دوام، د دوه اړخیزو اړیکو د پراختیا او د سیمې د امنیتي وضعیت په اړه هر اړخیزې خبرې کړې دي

په دې لیدنه کې دواړو لورو د افغانستان او چین ترمنځ د سیاسي، اقتصادي او سوداګریزو اړیکو د لا پیاوړتیا پر اړتیا ټینګار کړی او ویلي یې دي چې د متقابل باور فضا د همکاریو د پراخېدو لپاره بنسټیز اهمیت لري

د خبرو په جریان کې د ارومچي د پخوانیو او روانو مذاکراتي پړاوونو د دوام موضوع هم یاده شوې او دواړو خواوو څرګنده کړې چې د ستونزو د حل لپاره د خبرو اترو بهیر باید دوام ومومي، څو د ګډو ګټو پر بنسټ عملي پرمختګونه رامنځته شي

همدارنګه د سیمې د امنیتي وضعیت په اړه هم نظرونه تبادله شوي او ټینګار شوی چې د سیمه‌ ییز ثبات ساتل د ټولو هېوادونو ګډ مسوولیت دی. دواړو لورو ویلي چې د امنیت ټینګښت نه یوازې د افغانستان او چین، بلکې د ټولې سیمې د اقتصادي پرمختګ لپاره حیاتي رول لري

د اقتصادي همکاریو په برخه کې هم د پانګونې، ترانزیټي لارو او سوداګریزو اسانتیاوو پر پراختیا خبرې شوې دي. په ځانګړي ډول د چین او افغانستان ترمنځ د اقتصادي دهلیزونو د پیاوړتیا موضوع د بحث مهم ټکی و، چې د دواړو هېوادونو د اوږدمهالو اقتصادي ګټو لپاره مهم بلل کېږي

شنونکي وایي، د کابل او بیجینګ ترمنځ دا ډول ناستې د اړیکو د پیاوړتیا او د سیمه‌ییزو معادلو د بدلیدونکي حالت په درک کې مهم رول لري، په ځانګړي ډول په داسې وخت کې چې افغانستان د سیاسي او اقتصادي بدلونونو له پړاو څخه تېرېږي او د ګاونډیو هېوادونو همکاري ورته زیات اهمیت لري