ولسمشر ولادیمیرپوتین: د اوکراین جګړې د پای نښې را څرګندې شوې دي

ولسمشر ولادیمیرپوتین: د اوکراین جګړې د پای نښې را څرګندې شوې دي

  بریا نیوز (دوشنبه،۲۱ثور ۱۴۰۵)

د  ولسمشر ولادیمیر پوتین په وینا، له اوکراین سره د روسیې اوږده او خونړۍ جګړه ښايي د پای وروستیو پړاوونو ته نږدې شوې وي

پوتین دغه څرګندونې د دویمې نړیوالې جګړې پر مهال پر نازي جرمني د پخواني شوروي اتحاد د بریا د کلیزې له مراسمو وروسته خبریالانو ته کړې دي. نوموړي ویلي، داسې احساس کوي چې روان کړکېچ ورو ورو د حل پر لور روان دی او راتلونکې موده کې د سولې لپاره مهم بدلونونه رامنځته کېدای شي

د روسیې ولسمشر ویلي، د اوکراین ولسمشر غواړي له ده سره مخامخ لیدنه وکړي، خو ټینګار یې کړی چې دا ډول لیدنه باید یوازې د یوې تلپاتې او رسمي سولې هوکړې د رامنځته کېدو لپاره ترسره شي، نه د لنډمهاله سیاسي نمایش لپاره

پوتین زیاته کړې، مسکو د داسې سولې غوښتونکی دی چې د روسیې امنیتي اندېښنې او ستراتیژیکې غوښتنې په کې خوندي وي. هغه ویلي، تر هغو چې د جګړې اصلي عوامل حل نه شي، هر ډول لنډمهاله تفاهم به بې‌ګټې وي

د روسیې او اوکراین جګړه چې له څو کلونو راهیسې روانه ده، زرګونه کسان یې وژلي، میلیونونه خلک یې کډوال کړي او د نړۍ پر اقتصاد، انرژۍ او نړیوال امنیت یې ژور اغېز کړی دی

سیاسي شنونکي وایي، د پوتین وروستۍ څرګندونې ښيي چې مسکو ښايي د جګړې د اوږدېدو له اقتصادي او پوځي فشارونو وروسته د سیاسي حل لارو پر لور نرم دریځ غوره کړی وي، خو لا هم د دواړو لورو ترمنځ ژور اختلافات موجود دي

تر اوسه د ولسمشر زیلېنسکي له لوري د پوتین د دغو تازه څرګندونو په اړه رسمي غبرګون نه دی خپور شوی