اخبار جهان

د امریکا استازو جرګې د ایران جګړې د پراخېدو د مخنیوي پرېکړه‌لیک تصویب کړ

اشتراک گذاری:

بریانیوز(پنجشنبه، ۱۲ جوزا ١٤٠٥)

د امریکا استازو جرګې، چې مشري یې جمهوري غوښتونکي کوي، د چهارشنبې په ورځ یو پرېکړه‌لیک تصویب کړ چې موخه یې له ایران سره د جګړې د پراخېدو مخنیوی او د پوځي اقدام په اړه د کانګرس د واک ټینګار دی

د راپورونو له مخې، دغه پرېکړه‌لیک د ۲۱۵ موافقو او ۲۰۸ مخالفو رایو په ترلاسه کولو سره تصویب شو. په رایه اچونه کې څلورو جمهوري غوښتونکو استازو هم د ډیموکراتانو ترڅنګ د دې طرحې ملاتړ وکړ

د سیاسي څارونکو په باور، د دې پرېکړه‌لیک تصویب ښيي چې د جمهوري غوښتونکي ګوند دننه هم د امریکا او ایران ترمنځ د احتمالي پراخې جګړې په اړه اندېښنې مخ په زیاتېدو دي

د پرېکړه‌لیک له مخې، له ولسمشر ډانلډ ټرمپ غوښتنه شوې چې له ایران سره د هر ډول پراخ پوځي ښکېلتیا پر مهال امریکایي ځواکونه له جګړې وباسي، مګر دا چې کانګرس په رسمي ډول د جګړې اعلان وکړي یا د پوځي ځواک د کارولو ځانګړې اجازه ورکړي

د امریکا د اساسي قانون له مخې، د جګړې اعلان او د پوځي عملیاتو د پراخولو مهم صلاحیتونه د کانګرس له واکونو څخه ګڼل کېږي، له همدې امله د استازو جرګې غړو هڅه کړې چې په دې برخه کې خپل قانوني رول لا څرګند کړي

دا پرېکړه‌لیک په داسې وخت کې تصویبېږي چې د امریکا او ایران ترمنځ ترینګلتیاوې لوړې شوې او په نړیواله کچه د یوې پراخې سیمه‌ییزې جګړې په اړه اندېښنې زیاتې شوې دي