کابل کې د يو طالب جنګيالي له لوري د ۱۷ کلن ځوان وژل کېدل

اشتراک گذاری:

د کابل ښار د څلورمې ناحيې اړوند سرای شمالي سيمه کې د يو طالب جنګيالي له لوري د ۱۷ کلن ځوان د وژل کېدو د پېښې په تړاو بريا نيوز ته تازه معلومات رسېدلي دي.

بریانیوز- دوشنبه، ٢٥ جوزا ١٤٠٥

د معلوماتو له مخې، دغه پېښه پرون مازيګر رامنځته شوې ده. عيني شاهدان او د مقتول خپلوان وايي چې يو ځوان د طالب جنګيالي له وېرې منډه اخيستې وه، خو نوموړي پرې له شا ډزې کړې دي.

مقتول محمود نومېده، د محمد ګل زوی و او د کابل د شکردرې ولسوالۍ د مرغزار درې اصلي اوسېدونکی و. هغه په سرای شمالي سيمه کې اوسېده او د سودا اخيستلو لپاره بازار ته تللی و چې يادې پېښې ژوند ترې واخيست.

د محمود کليوالو بريا نيوز ته ويلي چې د وژل کېدو پېښه قصدي بڼه لري او د عدالت غوښتنې لپاره يې د طالبانو د څلورمې امنيتي حوزې او اړوندو قوماندانيو ته مراجعه کړې ده.

د سرچينو په وينا، د محمود او يو بل ځوان تر منځ د ويښتانو د بڼې په اړه لفظي شخړه رامنځته شوې وه. وروسته ياد ځوان يو طالب جنګيالی ورغوښتی و. کله چې محمود د سيمې پرېښودو هڅه کړې او منډه يې اخيستې، طالب جنګيالي پرې له شا ډزې کړې او په سر د مرمۍ له لګېدو وروسته يې ژوند له لاسه ورکړی دی.

د مقتول کورنۍ او خپلوان د پېښې د بشپړې څېړنې او د ښکېل طالب جنګيالي د محاکمې غوښتنه کوي. تر اوسه د طالبانو مسؤلو ادارو د دې پېښې په اړه رسمي څرګندونې نه دي کړې.