مجید قرار: د طالبانو سره د نړیوالو اړیکې د افغانستان د ګټو پر ځای د شخصي موخو لپاره کارېږي

مجید قرار: د طالبانو سره د نړیوالو اړیکې د افغانستان د ګټو پر ځای د شخصي موخو لپاره کارېږي

بریانیوز- سه شنبه ٢۶ جوز ١٤٠٥

افغان سیاسي فعال او لیکوال مجید قرار وایي چې له طالبانو سره د نړۍ د هېوادونو تعامل د افغانستان د خلکو د ملي ګټو پر بنسټ نه، بلکې د هر هېواد د خپلو سیاسي، اقتصادي او ستراتیژیکو موخو د ترلاسه کولو لپاره روان دی

نوموړي د ایکس په یوه سپېس کې ویلي چې هر هېواد له طالبانو سره د خپلو ځانګړو ګټو له مخې اړیکې پراخوي، خو په دې بهیر کې د افغانانو اساسي اړتیاوې، د هېواد اوږدمهاله ثبات او د ملي ګټو موضوعات تر ډېره له پامه غورځول کېږي

هغه زیاته کړې چې سعودي عربستان او ترکیه له طالبانو سره د دې لپاره تعامل کوي چې په افغانستان کې د خپلو دیني او فکري اغېز د پراختیا لپاره زمینه برابره کړي

د هغه په وینا اروپایي هېوادونه بیا د افغان کډوالو د ستونزې د مدیریت او د هغوی د بېرته ستنولو په هدف له دې ډلې سره اړیکې ساتي

قرار ادعا کوي چې چین د افغانستان د طبیعي زېرمو او اقتصادي فرصتونو د ترلاسه کولو لپاره طالبانو ته نږدې شوی، په داسې حال کې چې ایران هم خپلې امنیتي او سیمه‌ییزې محاسبې مخې ته وړي

هغه همدارنګه ویلي چې هند د طالبانو د بهرنیو چارو وزیر ته د بلنې په ترڅ کې هغه ته د دیوبند مدرسې لیدنه هم ور په برخه کړه، چې د تعامل د نوعیت په اړه ځانګړی پیغام لري

نوموړي طالبان د افغانستان د ملي هویت، فرهنګي جوړښت او د ملي یووالي پر ضد یوه پاکستانۍ پروژه بللې او ویلي یې دي چې د دغې ډلې اقدامات د هېواد د بنسټونو د کمزوري کېدو او د ټولنیز انسجام د زیانمنېدو لامل شوي دي

قرار ټینګار کړی چې نړیوال ځواکونه له طالبانو سره تعامل تر ډېره د خپلو ګټو د پوره کولو لپاره کاروي، نه د افغانستان د اوږدمهال ثبات او پرمختګ لپاره.

دا څرګندونې په داسې حال کې کېږي چې یو شمېر نور شنونکي هم وایي د طالبانو او نړیوالو اړیکې تر ډېره د جیوپولیتیکو او ستراتیژیکو ګټو پر محور ولاړې دي