سیاست

خواجه اصف: د بنو بریدونه د ترهګرۍ د ګواښ دوام ښيي؛ افغانستان او هند یې تر شا دي

اشتراک گذاری:

بریانیوز- دوشنبه ۱ سرطان ١٤٠٥

د پاکستان د دفاع وزیر خواجه اصف د خیبرپښتونخوا د بنو ولسوالۍ له وروستیو پرله‌پسې چاودنو وروسته ویلي چې پاکستان باید د ترهګرۍ پر وړاندې په یو موټي او پیاوړي دریځ سره مبارزه وکړي او د ناامنۍ عاملینو ته د فعالیت فرصت ور نه کړي

نوموړي ادعا کړې چې په پاکستان کې د رامنځته کېدونکو ترهګریزو پېښو تر شا افغانستان او هند لاس لري او دا مسئله د هېواد د امنیت لپاره جدي ګواښ ګڼل کېږي

هغه ویلي چې د دغو فعالیتونو موخه په پاکستان کې د بې‌ثباتۍ رامنځته کول او د امنیتي وضعیت خرابول دي

خواجه اصف ټینګار کړی چې د وروستیو بریدونو له امله باید ټول سیاسي او امنیتي بنسټونه خپل اختلافات یوې خوا ته پرېږدي او د ترهګرۍ پر وړاندې د ملي یووالي له لارې ګډه مبارزه پر مخ یوسي

هغه زیاته کړې چې پاکستان به د خپلې خاورې، خلکو او ملي امنیت د خوندي کولو لپاره ټولې ممکنې لارې وکاروي او د هغو ډلو او شبکو پر وړاندې به سخت اقدامات وکړي چې د هېواد د امنیت د زیانمنولو هڅه کوي

د پاکستان د دفاع وزیر دغه څرګندونې په داسې وخت کې کړي چې د بنو وروستیو چاودنو د هېواد په امنیتي وضعیت او د ترهګرۍ د ګواښونو په اړه تازه بحثونه راپارولي دي