سیاست

مولوي فضل الرحمان: د پاکستان حکومت د امنیت او اقتصاد په برخه کې ناکام دی

اشتراک گذاری:

بریانیوز- دوشنبه ۱ سرطان ١٤٠٥

د پاکستان د سیاسي او مذهبي شخصیت مولوي فضل الرحمان په تازه څرګندونو کې ویلي چې د پاکستان حکومت د خلکو د امنیت د ټینګښت په برخه کې ناکام پاتې شوی او د هېواد روان وضعیت د جدي اندېښنې وړ دی

نوموړي ادعا کړې چې حکومت نه یوازې د امنیتي ستونزو په حل کې پرمختګ نه دی کړی، بلکې د فساد د کمولو او د عامو خلکو د ژوند د اسانتیاوو د برابرولو په برخه کې هم ناکام دی. هغه ویلي چې د خلکو اقتصادي ستونزې ورځ تر بلې زیاتېږي او د ژوند لګښتونه لوړ شوي دي

مولوي فضل الرحمان د حکومت پر مالي سیاستونو هم نیوکه کړې او ویلي یې دي چې د مالیاتو په نوم د خلکو له جېبونو زیات فشار اخیستل کېږي، خو په بدل کې یې د عامو خلکو لپاره محسوسې اسانتیاوې نه لیدل کېږي

هغه همدارنګه ویلي چې د پاکستان اقتصاد تر ډېره د پیسو نړیوال صندوق پر پورونو متکي شوی، چې د ده په باور دا وضعیت د هېواد اقتصادي بحران لا پسې ژوروي

نوموړي ټینګار کړی چې د اوسنیو تګلارو دوام کولی شي د خلکو ستونزې نورې هم زیاتې کړي او د هېواد د ثبات لپاره جدي بدلونونو ته اړتیا ده