مقاله

خالد حنفي: د اسلامي نظام تر چتر لاندې د یووالي فضا پیاوړې شوې

اشتراک گذاری:

بریانیوز- سه شنبه ۲ سرطان ١٤٠٥

د طالبانو د امر بالمعروف او نهی عن المنکر وزیر محمد خالد ویلي چې هغه اختلافات او وېشونه چې د ده په وینا د افغانستان د دښمنانو له لوري رامنځته شوي وو، د اسلامي نظام له بیا واکمنېدو وروسته تر ډېره له منځه تللي دي

حنفي دا څرګندونې د خپل وزارت له لوري د جوړ شوي روزنیز او اصلاحي سیمینار د پای غونډې پر مهال کړې دي. نوموړي دیني مبلغینو ته سپارښتنه کړې چې د شریعت د احکامو په بیان او د خلکو د دعوت په بهیر کې له نرمۍ، حکمت او ښه اخلاقو څخه کار واخلي

هغه ویلي چې د ټولنې اصلاح یوازې د نصیحت او لارښوونې له لارې ممکنه ده، او مبلغین باید له بېړې او سختۍ څخه ډډه وکړي، څو د خلکو باور او همکاري ترلاسه کړي

د امر بالمعروف وزیر همداراز ټینګار کړی چې د دعوت او اصلاح چارې صبر، زغم او دوامدارې هڅې غواړي، او هر مبلغ باید د نورو د اصلاح تر څنګ د خپل شخصیت او نفس په روزنه هم پام وکړي

د نوموړي په وینا، د دیني ارزښتونو پیاوړتیا او د ټولنیز یووالي ساتنه د ټولو دیني فعالانو او مبلغینو ګډ مسؤلیت دی