ورزش

د افغانستان کرکټ ویاړ؛ راشد خان د نړۍ لومړی توپ‌اچوونکی شو، عظمت‌الله عمرزی د غوره آل‌راونډر لقب خپل کړ

اشتراک گذاری:

بریانیوز-جمعه ۵ سرطان ١٤٠٥

کابل – د افغانستان د کرکټ ملي لوبډلې ستورو یو ځل بیا په نړیوال ډګر کې د هېواد نوم روښانه کړی؛ د کرکټ نړیوالې شورا په تازه درجه‌بندۍ کې راشد خان د شل اوریزو او پنځوس اوریزو سیالیو په کټګوریو کې د نړۍ د غوره توپ‌اچوونکو لومړی مقام خپل کړی دی

دغه تازه درجه‌بندي ښيي چې افغان ورو توپ‌اچوونکی راشد خان لا هم د نړۍ د مخکښو لوبغاړو په سر کې ځای لري او د خپلو پرله‌پسې غوره کړنو له امله یې نړیوال اعتبار نور هم پیاوړی کړی دی

بل لور ته، د افغانستان تکړه آل‌راونډر عظمت‌الله عمرزي د ۳۱۶ امتیازونو په ترلاسه کولو سره د پنځوس اوریزو سیالیو د نړۍ د غوره آل‌راونډر مقام ګټلی دی. نوموړي په دې برخه کې د زیمبابوې مشهور لوبغاړی سکندر رضا شاته پرېښی او د درجه‌بندۍ لومړی ځای یې خپل کړی دی

عمرزي په وروستیو سیالیو کې د توپ‌وهنې او توپ‌اچونې په دواړو برخو کې ځلېدلی او د افغانستان د بریاوو مهم لوبغاړی بلل کېږي

همدارنګه، د افغانستان مخکښ توپ‌وهونکی ابراهیم ځدراڼ د نوې درجه‌بندۍ له مخې دوه درجې شاته تللی او د پنځوس اوریزو سیالیو د غوره توپ‌وهونکو په نوملړ کې پنځم مقام ته راښکته شوی دی

د کرکټ شنونکي باور لري چې د راشد خان او عظمت‌الله عمرزي دا لاسته راوړنې د افغانستان د کرکټ د دوامدار پرمختګ څرګندونه کوي او ښيي چې افغان لوبغاړي اوس د نړیوال کرکټ له سترو نومونو سره اوږه په اوږه سیالي کوي

د افغانستان کرکټ مینه‌وال دغه بریاوې د هېواد لپاره د ویاړ وړ بولي او هیله څرګندوي چې ملي لوبډله به په راتلونکو نړیوالو سیالیو کې هم خپلې ځلانده لاسته راوړنې جاري وساتي