د افغانستان کانونه د سیمې د اقتصادي بدلون فرصت؛ ایراني سوداګر د ګډو پانګونو غوښتنه وکړه

د افغانستان کانونه د سیمې د اقتصادي بدلون فرصت؛ ایراني سوداګر د ګډو پانګونو غوښتنه وکړه

بریانیوز-دوشنبه ۸ سرطان ١٤٠٥

د افغانستان او ایران د سوداګرۍ ګډې خونې مشر محمود سیادت ویلي، افغانستان د نړۍ له هغو هېوادونو څخه دی چې د پام وړ غیر استخراج شوې کانیزې زېرمې لري، او ارزښت یې د اټکلونو له مخې له یو تر درې ټریلیون ډالرو پورې رسېږي

سیادت د ایران له فارس خبري اژانس سره په خبرو کې ویلي، افغانستان د دې وړتیا لري چې په راتلونکو کلونو کې د نړۍ د کانونو له مهمو مرکزونو څخه شي، خو د دې هدف لپاره پراخو پانګونو، پرمختللې ټکنالوژۍ او سیمه‌ییزې همکارۍ ته اړتیا ده

هغه ټینګار کړی چې ایران باید د افغانستان د کانونو په سکټور کې د نورو هېوادونو د پراخ حضور یوازې ننداره ونه کړي، بلکې د جیوپولیټیک او جیوایکانومیک موقعیت له مخې د کابل لپاره یو مهم او باوري اقتصادي شریک شي

د نوموړي په وینا، د افغانستان د بډایه کانیزو سرچینو، د ایران د انرژۍ، صنعتي ټکنالوژۍ او ترانزیټي ظرفیتونو یوځای کول کولای شي په سیمه کې یو پیاوړی اقتصادي او کانیز محور رامنځته کړي، چې د دواړو هېوادونو اوږدمهاله اقتصادي ګټې به خوندي کړي

سیادت همداراز ویلي، د ګډو پانګونو پراختیا، د کانونو د پروسس صنعت ته وده او د ترانزیټي دهلېزونو پیاوړتیا نه یوازې د افغانستان او ایران اقتصادي اړیکې ژوروي، بلکې د سیمې په اقتصادي اتصال او سوداګرۍ کې به هم مهم بدلون رامنځته کړي

اقتصادي شنونکي باور لري چې د افغانستان د کانونو سکټور د هېواد د اقتصادي ودې له مهمو فرصتونو څخه ګڼل کېږي او د سیمه‌ییزو پانګونو پراخېدل کولای شي د کانونو د استخراج، د کارموندنې او صادراتو په برخه کې د پام وړ پرمختګ رامنځته کړي