کډوالو چارو ادارې:د ملګرو ملتونو د کډوالو او پرمختیايي ادارو مشرانو د بېرته راستانه شویو کډوالو وضعیت وڅېړه

کډوالو چارو ادارې:د ملګرو ملتونو د کډوالو او پرمختیايي ادارو مشرانو د بېرته راستانه شویو کډوالو وضعیت وڅېړه

بریانیوز - سه شنبه، ١۶ سرطان ١٤٠٥

د ملګرو ملتونو د کډوالو چارو ادارې او د پرمختیايي ادارې مشرانو افغانستان ته د خپل سفر پر مهال د سرپرست حکومت له چارواکو، بېرته راستانه شویو کډوالو او سیمه‌ ییزو مسوولانو سره لیدنې کړې دي

د دغو ادارو مشرانو ویلي، د دوی د سفر موخه دا ده چې د بېرته راستانه شویو کډوالو ستونزې، اړتیاوې او د ژوند اوسنی وضعیت له نږدې وڅېړي او د هغوی د ملاتړ لپاره د مرستو لارې چارې وارزوي

دوی له کابل وروسته بلخ ولایت ته هم سفر وکړ، هلته یې له سیمه‌ییزو چارواکو سره خبرې وکړې او د بېرته راستانه شویو کډوالو یو مېنځای او د کارموندنې څو پروژې یې له نږدې وکتلې

د دغو پروژو پر مهال لیدل شوي چې بېرته راستانه شوي کډوال او ځايي اوسېدونکي، د ښځو په ګډون، په بېلابېلو کاري او تولیدي برخو کې بوخت دي. د ملګرو ملتونو استازو ټینګار وکړ چې د هېواد د ستونزو د هواري او پرمختګ لپاره د ښځو او نارینه‌وو دواړو ونډه او وړتیا مهمه ده

دوی همدارنګه وویل، د بېرته راستانه شویو کډوالو لپاره د کار زمینه برابرول، د ژوند لومړنۍ اسانتیاوې رامنځته کول او د هغوی ملاتړ د اوسنیو اړتیاوو له مهمو برخو څخه دي

د ملګرو ملتونو د دغو ادارو د مشرانو سفر په داسې وخت کې ترسره کېږي چې په وروستیو میاشتو کې له ایران او پاکستان څخه ډېر شمېر افغان کډوال خپل هېواد ته بېرته راستانه شوي او د هغوی د اړتیاوو پوره کول لا هم یوه ستره ننګونه ګڼل کېږي