ښوونځي : غزني کې ۲۰۰ ښوونځي ودانۍ نه لري، د ۳۵۰ نورو د بیارغونې اړتیا ده

اشتراک گذاری:

بریانیوز - سه شنبه، ١۶ سرطان ١٤٠٥

د غزني د پوهنې ریاست وایي، په دغه ولایت کې لا هم سلګونه ښوونځي د مناسبې ودانۍ له نشتوالي او د ښوونیزو تاسیساتو له زړېدو سره مخ دي، چې د زده‌کوونکو پر زده‌کړو یې منفي اغېز کړی دی

د یاد ریاست د شمېرو له مخې، په غزني کې له ۶۷۵ فعاله ښوونځیو څخه شاوخوا ۲۰۰ ښوونځي هېڅ ودانۍ نه لري او زده‌کوونکي یې تر ډېره د ونو تر سیورو، په خېمو او یا هم په خلاصه فضا کې زده‌کړې کوي

همدارنګه د ۳۵۰ نورو ښوونځیو ودانۍ د وخت په تېرېدو زړې او زیانمنې شوې دي او بیړنۍ بیارغونې ته اړتیا لري، څو زده‌کوونکو ته خوندي او مناسب ښوونیز چاپېریال برابر شي

د پوهنې مسوولین وایي، د ښوونځیو لپاره د نوو ودانیو جوړول او د زړو ودانیو رغول د ولایت له مهمو اړتیاوو څخه دي. د دوی په وینا، د دې پروژو عملي کېدل به د زده‌کوونکو د زده‌کړو کیفیت ښه کړي او د ښوونیز بهیر پر وړاندې به موجودې ستونزې راکمې کړي

غزني د افغانستان له هغو ولایتونو څخه دی چې د زده‌کوونکو شمېر پکې هر کال زیاتېږي، خو د ښوونیزو ودانیو کمښت لا هم د پوهنې سکټور له سترو ننګونو څخه ګڼل کېږي