اقتصاد

موټر چلوونکي: د تېلو لوړې بیې زموږ ورځنی عاید کم کړی دی

اشتراک گذاری:

بریانیوز جمعه - ١۹ سرطان ١٤٠٥

یو شمېر موټر چلوونکو ویلي چې د سون‌توکو د بیو لوړوالي د دوی پر ورځني عاید منفي اغېز کړی او د کار ستونزې یې زیاتې کړې دي

دوی وایي، په وروستیو کې د تېلو د بیو له زیاتېدو سره د موټرو د چلولو لګښتونه لوړ شوي، خو د مسافرو کرایې او عاید یې د دې لګښتونو له زیاتوالي سره برابر نه دي لوړ شوي

موټر چلوونکي زیاتوي چې د تېلو ترڅنګ د موټرو د ترمیم، پرزو او نورو اړینو توکو بیې هم لوړې شوې دي، چې له امله یې د ورځې پای کې د دوی پاتې عاید ډېر کم شوی دی

د دوی په وینا، د اقتصادي ستونزو له امله د خلکو د تګ راتګ کچه هم کمه شوې او ډېری کسان هڅه کوي خپل لګښتونه راکم کړي، چې دا چاره د ترانسپورټ پر کاروبار هم اغېز کوي

موټر چلوونکي له اړوندو ادارو غوښتنه کوي چې د سون‌توکو د بیو د کنټرول لپاره لازم ګامونه واخلي، څو د ترانسپورټ سکتور له لا ډېرو ستونزو سره مخ نه شي

د اقتصادي چارو شنونکي وایي، د تېلو د بیو بدلونونه په مستقیم ډول د ترانسپورټ پر لګښتونو او د خلکو پر ورځني ژوند اغېز کوي