مقاله

پاکستان: له نن څخه به بې‌ویزې افغان وګړي سمدستي ونیول شي

اشتراک گذاری:

بریانیوز جمعه - ١۹ سرطان ١٤٠٥

د پاکستان د کورنیو چارو وزارت په یوه رسمي مکتوب کې اعلان کړی چې د جولای له ۱۰مې، ټول هغه افغان وګړي چې په پاکستان کې له قانوني ویزې پرته اوسیږي، سمدستي به ونیول شي

د یاد وزارت له خوا په خپاره شوي لارښود کې د ایالتي ادارو، سیمه‌ییزو چارواکو، پولیسو او نورو اړوندو بنسټونو څخه غوښتل شوي چې دغه پرېکړه په بشپړه همغږۍ او اغېزمن ډول عملي کړي

د راپورونو له مخې، پاکستاني چارواکو ټینګار کړی چې د کډوالۍ او استوګنې اړوند قوانین به په جدي توګه پلي کېږي او هغه کسان چې د قانوني اسنادو له نشتوالي سره مخ وي، د نیولو او قانوني اقداماتو له بهیر سره به مخامخ شي

دا پرېکړه په داسې وخت کې عملي کېږي چې په وروستیو میاشتو کې له پاکستان څخه د افغان کډوالو د ایستلو بهیر چټک شوی او زرګونه افغانان بېرته خپل هېواد ته ستانه شوي دي

تر اوسه د افغانستان سرپرست حکومت د پاکستان د دې تازه پرېکړې په اړه رسمي غبرګون نه دی څرګند کړی، خو د کډوالو د حقونو ملاتړو بنسټونو له وړاندې د افغان کډوالو د وضعیت او د هغوی د حقونو د خونديتوب په اړه اندېښنې څرګندې کړې دي