د کراچۍ دارالافتاء: د نجونو د تعلیم بندول مطلق شرعي بنسټ نه لري

د پاکستان په کراچۍ کې د یوه مشهور دارالعلوم د دارالافتاء له لوري په افغانستان کې د نجونو د تعلیم په اړه ورکړل شوې یوه شرعي فتوا وايي، چې د نجونو له تعلیم او کار سره مطلق مخالفت له اسلامي او شرعي پلوه څرګند بنسټ نه لري.

بریانیوز- دوشنبه ١٩ اسد ١٤٠٥

د معلوماتو له مخې، د هریپور په افغان کمپ کې یوې افغان کډوالې مېرمنې د کراچۍ د دارالعلوم دارالافتاء ته په افغانستان کې د نجونو د تعلیم په اړه شرعي پوښتنه استولې وه.

د دارالافتاء په لیکلي ځواب کې د نجونو د تعلیم په اړه د اسلام له نظره د زده‌کړې مشروعیت تأیید شوی او ویل شوي چې د ښځو او نجونو د تعلیم او کار مخالفت په مطلق ډول اسلامي او شرعي اساس نه لري.

په فتوا کې د نجونو د تعلیم حق ته په داسې مهال ټینګار کېږي چې په افغانستان کې د طالبانو حکومت له څو کلونو راهیسې د نجونو پر زده‌کړو پراخ محدودیتونه لګولي دي. په ځانګړي ډول، له شپږم ټولګي پورته د نجونو د ښوونیزو زده‌کړو او د ښځو د لوړو زده‌کړو دوام له جدي بندیزونو سره مخ دی.

د کراچۍ د دارالافتاء دا دریځ یو ځل بیا هغه بحث تازه کوي چې په افغانستان کې د نجونو پر تعلیم او کار لګېدلي محدودیتونه تر کومه حده له اسلامي اصولو او د اسلامي نړۍ د علماوو له نظرونو سره سمون لري.

د اسلامي شریعت له مخې د علم او زده‌کړې ارزښت ته په پام سره، د دې فتوا ملاتړي باور لري چې د افغان نجونو د تعلیم حق باید د دیني او ټولنیزو بحثونو په ترڅ کې د شرعي اصولو پر بنسټ وڅېړل شي، نه دا چې د تعلیم دروازې په مطلق ډول د هغوی پر مخ وتړل شي.