د طالبانو د لومړۍ درجې مشران لا هم د مستعارو نومونو تر شا پټ؛ ذبیح‌الله مجاهد خپل اصلي هویت افشا کړ، نوم یې «طاهر شاه صدیقی» دی

اشتراک گذاری:

د طالبانو ویاند ذبیح‌الله مجاهد له بي‌بي‌سي سره په خبرو کې د لومړي ځل لپاره خپل اصلي نوم په ډاګه کړی او ویلي یې دي چې نوم یې طاهر شاه صدیقي دی.

بریانیوز- یکشنبه ٢ سنبله ١٤٠٥

بي‌بي‌سي پښتو د دوشنبې په ورځ، د سنبله په ۲مه، په یوه راپور کې ویلي چې مجاهد له ۲۰۲۱ کال راهیسې د طالبانو د رژیم له مهمو څېرو څخه دی او تر دې وړاندې یې د «ذبیح‌الله مجاهد» له مستعار نوم څخه کار اخیست.

مجاهد په دې مرکه کې د افغانستان د ښځو د وضعیت په اړه هم خبرې کړې او ادعا یې کړې چې طالبان د ښځو حقونو، د بیان ازادۍ او نورو مسایلو ته «د شریعت په چوکاټ کې» ژمن دي.

هغه د ښځو د کار او زده‌کړو په اړه د طالبانو د پخوانیو ژمنو د نه عملي کېدو په تړاو ویلي چې ټول مسایل باید «د شریعت له دریڅې» وکتل شي.

د طالبانو ویاند زیاته کړې چې د ده په څېر ادارو کې ښځو ته د کار اجازه ورکول «د مفاسدو سبب» کېږي او د ښځو «عزت تر پوښتنې لاندې» راولي.

دا په داسې حال کې ده چې مجاهد تر دې وړاندې ویلي وو چې ښځو ته به «زموږ په چوکاټونو کې» د کار او زده‌کړې اجازه ورکړل شي او هغوی به په ټولنه کې ډېرې فعالې وي.