د لږو محصلینو په پلمه؛ طالبان غواړي حقوق، سیاسي علوم او نړیوالې اړیکې لومړی له خصوصي او وروسته له دولتي پوهنتونونو هم حذف کړي

د حقوقو، سیاسي علومو او نړیوالو اړیکو د پوهنځیو د لغوه کولو پرېکړه؛ د سیاسي او علمي فضا د لا محدودېدو په لور بل ګام

بریانیوز- یکشنبه، ٢ سنبله ١٤٠٥

د طالبانو تر واک لاندې د لوړو زده‌کړو وزارت د رهبرۍ شورا د وروستۍ غونډې په پرېکړو کې، د ترلاسه شویو اسنادو له مخې، په دې پلمه چې په دغو څانګو کې د محصلینو شمېر کم دی، په خصوصي پوهنتونونو کې د حقوقو، سیاسي علومو او نړیوالو اړیکو د پوهنځیو د لغوه کولو پرېکړه کړې ده.

د دې پرېکړې د منتقدانو په باور، د خصوصي پوهنتونونو څخه د دغو پوهنځیو د حذفولو بهیر ښايي د یوې پراخې او تدریجي پروسې پیل وي چې په راتلونکي کې به د دولتي پوهنتونونو له تحصیلي جوړښت څخه هم دغه څانګې ورو ورو حذف شي. که دا بهیر عملي شي، په افغانستان کې به د حقوقو، سیاست او نړیوالو اړیکو د زده‌کړې او مسلکي روزنې ساحه لا محدوده شي.

که دا پرېکړه عملي شي، دا به یوازې د څو تحصیلي څانګو د تړل کېدو موضوع نه وي؛ بلکې د افغانستان د علمي او سیاسي فضا د لا محدودېدو په لړ کې به یو بل ګام وي. داسې ښکاري چې د دغو پوهنځیو د تدریجي له منځه وړلو له لارې به په راتلونکې کې د سیاست، حکومتولۍ، حقوقو او نړیوالو اړیکو په برخو کې د نوي نسل د مسلکي روزنې زمینه لا محدوده شي.

حقوق، سیاسي علوم او نړیوالې اړیکې د یوه هېواد د دولت جوړونې، قانون‌مندۍ، عدالت، حکومتولۍ، دیپلوماسۍ او عامه سیاست لپاره له بنسټیزو علمي برخو څخه دي. افغانستان، چې له لسیزو راهیسې له جګړو، سیاسي بې‌ثباتۍ، کمزورو بنسټونو او ژورو حقوقي او سیاسي ستونزو سره مخ دی، د دغو برخو متخصصانو ته تر بل هر وخت ډېره اړتیا لري.

د دغو څانګو محدودول کولی شي د افغانستان د راتلونکي نسل د سیاسي او حقوقي زده‌کړو فرصتونه کم کړي او د هېواد د سیاسي چارو په اړه د علمي بحث، انتقادي فکر او مسلکي روزنې فضا لا تنګه کړي.