اخبار جهان

واشنګټن : د افغانستان د جګړې د وتلو د پرېکړو د څېړنې غوښتنه

اشتراک گذاری:

بریانیوز شنبه ( ۷/ سنبله /۱۴۰۵هـ.ش)

د امریکا د بهرنیو جګړو د تجربه‌کارو سرتېرو ټولنې له افغانستانه د امریکايي ځواکونو د وتلو د څرنګوالي او پرېکړو د لا دقیقې ارزونې غوښتنه کړې ده

دغه ټولنې د کابل د سقوط او د افغانستان د جګړې د پای پنځمې کلیزې په مناسبت په یوه اعلامیه کې ویلي، د شاوخوا شلو کلونو جګړې تجربې باید په راتلونکو پوځي عملیاتو کې د امریکا د پرېکړو لپاره مهم درسونه وګرځي

د ټولنې په وینا، له ۸۰۰ زرو ډېر امریکايي سرتېري د افغانستان د جګړې پر مهال په دغه هېواد کې دنده ترسره کړې او له ۲۴۰۰ ډېر امریکايي سرتېري وژل شوي دي

په اعلامیه کې د کابل هوايي ډګر د «ابي ګېټ» برید هم د افغانستان د جګړې له تر ټولو دردناکو پېښو څخه بلل شوی دی. د ۲۰۲۱ کال د اګست په ۲۶مه په دغه برید کې ۱۳ امریکايي سرتېري ووژل شول او لسګونه نور ټپیان شول.

د تجربه‌کارو سرتېرو ټولنې ویلي، د وتلو د وروستیو ورځو پېښې او د ابي ګېټ برید باید هېر نه شي، بلکې د هغو لاملونه او د پرېکړو څرنګوالی باید په دقت وڅېړل شي

دغې ټولنې ټینګار کړی چې د افغانستان له جګړې ترلاسه شوي درسونه باید یوازې د تاریخ برخه پاتې نه شي، بلکې د امریکا د راتلونکو پوځي عملیاتو د پلان جوړونې او پریکړو لپاره ترې عملي ګټه واخیستل شي