مقاله

نیپال :د خونړیو سېلابونو مرګ‌ژوبله لوړه شوې؛ له ۹۰۰ ډېر کسان وژل شوي

اشتراک گذاری:

بریانیوز چهار شنبه ( ۱۱/ سنبله /۱۴۰۵هـ.ش)

کتمندو — په نیپال او د چین په تبت کې د وروستیو ویجاړونکو سېلابونو له امله د مړو شمېر له ۹۰۰ اوښتی او د سلګونو کسانو د ورکېدو له امله د ژغورنې او لټون عملیات لا هم روان دي

د نیپال د چارواکو د معلوماتو له مخې، په دغه هېواد کې د مړو شمېر ۹۰۳ تنو ته رسېدلی او شاوخوا ۴۲۴۷ کسان لا هم نادرکه دي. د سېلابونو له امله زرګونه کسان زیانمن شوي او ګڼې ودانۍ او بنسټیزې اسانتیاوې هم ویجاړې شوې دي

د راپورونو له مخې، په سېلابونو کې د اوبو، خټو او ډبرو سترې څپې د استوګنې سیمې، سړکونه او نورې زېربناوې له منځه وړي دي. د ژغورنې ډلې هڅه کوي هغو سیمو ته ځان ورسوي چې د خرابو لارو او ویجاړو شویو تاسیساتو له امله ورته لاسرسی ستونزمن شوی دی

بلخوا، د چین د تبت په سیمه کې چارواکي وايي چې تر اوسه ۱۶ کسان وژل شوي او ۵۴۶ نور نادرکه دي. د ژغورنې ډلې په سختو شرایطو کې د نادرکه کسانو د موندلو لپاره خپلو عملیاتو ته دوام ورکوي

د دې طبیعي ناورین د رامنځته کېدو له مهمو لاملونو څخه د همالیا په غرونو کې د یخچالونو د نړېدو او ورپسې د اوبو او خټو د سترې څپې رامنځته کېدل یاد شوي دي

چارواکي وايي، د لا ډېرو قربانیانو د موندلو لپاره د لټون عملیات دوام لري، خو خراب هوا، ویجاړ شوي سړکونه او د ځمکې ښویېدنې د ژغورنې چارې له جدي خنډونو سره مخ کړې دي