سیاست

سپاه پاسداران ویاند : ایران امریکا ته خبرداری: که برید وشي، نوې وسلې به وکاروو

اشتراک گذاری:

(بریانیوز سه شنبه (۳۱/ سنبله /۱۴۰۵هـ.ش

د ایران د سپاه پاسداران ویاند حسین محبي امریکا ته خبرداری ورکړی چې که پر ایران نوی برید ترسره شي، تهران به د جګړې په ځواب کې له هغو وسلو کار واخلي چې تر اوسه یې نه دي کارولي

نوموړي ویلي، ایران داسې نوې وسلې او پوځي وړتیاوې چمتو کړې دي چې د ده په وینا، په راتلونکي احتمالي برید کې به یې کارول د جګړې بڼه او جغرافیه بدله کړي

محبي، پرته له دې چې د دغو وسلو په اړه جزیات وړاندې کړي، ویلي چې د امریکا د نوي برید په صورت کې به ایران داسې ځواب ورکړي چې نړۍ به یې له لیدلو حیرانه شي

هغه زیاته کړې، د ایران په احتمالي ځواب کې به هغه سیمې هم په نښه شي چې تر اوسه د جګړې له مستقیمو بریدونو خوندي پاتې شوې دي

د سپاه پاسداران ویاند دغه نوې پوځي وړتیاوې د ایران «ستراتېژیکې وسلې» بللې او ویلي یې دي چې د اړتیا په صورت کې به ترې استفاده وشي

د نوموړي څرګندونې په داسې حال کې مطرح کېږي چې د ایران او امریکا ترمنځ پوځي او سیاسي ترینګلتیا دوام لري او د دواړو لورو ترمنځ د احتمالي پوځي اقداماتو په اړه ګواښونه او خبرداري زیات شوي دي