سلامت و غذا

خوړو نړیوال پروګرام : په یمن کې د خوړو بحران ژورېږي؛ له ۱۸ میلیونو ډېر کسان له لوږې سره مخ دي

اشتراک گذاری:

(بریانیوز چهار شنبه (۱/ میزان /۱۴۰۵هـ.ش

په یمن کې د روانو نښتو او بې‌ځایه کېدو د زیاتېدو ترڅنګ، د خوړو نړیوال پروګرام خبرداری ورکړی چې په دغه هېواد کې د خوړو بحران لا پسې ژور شوی او میلیونونه کسان د خوراکي توکو له سخت کمښت سره مخ دي

د دغه بنسټ د معلوماتو له مخې، په یمن کې له ۱۸ میلیونو ډېر کسان د خوړو له جدي کمښت سره مخ دي، په داسې حال کې چې نږدې ۲.۲ میلیونه له پنځو کلونو کم عمره ماشومان له شدیدې خوارځواکۍ کړېږي

د خوړو نړیوال پروګرام وايي، تر اوسه یې نږدې ۶۰ زره کسانو ته ګرم خواړه او خوراکي توکي رسولي او هڅې روانې دي چې د اړتیا وړ مرستې سلګونو زرو نورو زیانمنو کسانو ته هم ورسول شي

د دغه پروګرام د اجرائیوي مدیریت سرپرست کارل سکاو ویلي، د یمن شاوخوا ۹۰ سلنه خوراکي توکي له بهر څخه واردېږي؛ له همدې امله د بندرونو او هوايي ډګرونو په فعالیت کې هر ډول خنډ د خلکو پر خوراکي خوندیتوب مستقیم اغېز کوي

نوموړي ټینګار کړی چې د خوراکي توکو د رسولو د لارو پرانیستې پاتې کېدل او اړمنو سیمو ته د بشري مرستو رسېدل د بحران د لا پراخېدو د مخنیوي لپاره مهم دي

په یمن کې د جګړو، اقتصادي ستونزو او د خلکو د بې‌ځایه کېدو دوام د دغه هېواد بشري وضعیت لا پېچلی کړی او د خوراکي مرستو اړتیا یې په بې‌ساري ډول زیاته کړې ده