خیبر پښتونخوا : تحریک انصاف په لکي مروت کې د سهیل اپریدي په مشرۍ لانګ مارچ پیل کړ

خیبر پښتونخوا : تحریک انصاف په لکي مروت کې د سهیل اپریدي په مشرۍ لانګ مارچ پیل کړ

(بریانیوز دوشنبه(۱۳/ میزان /۱۴۰۵هـ.ش

د پاکستان تحریک انصاف ګوند د مرکزي حکومت او دغه ګوند ترمنځ د خبرو له بې پایلې پای ته رسېدو وروسته، د خیبر پښتونخوا د اعلی وزیر سهیل اپریدي په مشرۍ له لکي مروت څخه خپل «لانګ مارچ» پیل کړی دی

د لاریون په پیل کې سهیل اپريدي وویل، د ګوند مرکچي پلاوي اسلام‌اباد ته د سیاسي کړکېچ او تاوتریخوالي د کمولو په موخه سفر کړی و، خو خبرې د دواړو لورو ترمنځ د اختلافونو له امله پایلې ته ونه رسېدې

نوموړي ویلي، تحریک انصاف نه د خیبر پښتونخوا لپاره د «ګورنر راج» منلو ته چمتو دی او نه هم د بېړني حالت ملاتړ کوي. هغه ټینګار کړی چې د صوبې اړوند سیاسي او امنیتي ستونزې باید د خبرو او سیاسي تعامل له لارې حل شي

د اعلان شوي مهال‌وېش له مخې، د ټانک، ډېره اسماعیل خان، جنوبي وزیرستان، شمالي وزیرستان، بنو او لکي مروت خلک د لکي مروت له مرکزي کاروان سره یوځای شوي او کاروان د کرک پر لور حرکت کړی دی. ټاکل شوې چې د اکتوبر په ۵مه د کرک سیمه‌ییز ګډونوال هم له لاریون سره یوځای شي او کاروان وروسته د کوهاټ پر لور وخوځېږي

د تحریک انصاف د پلان له مخې، کاروان به وروسته د کوهاټ، هنګو، کورم او اورکزیو له سیمو د ګډونوالو له یوځای کېدو وروسته د پېښور پر لور حرکت وکړي او د اکتوبر په اتمه به په خیراباد کې د کاروان د راتلونکي پړاو په اړه پرېکړه اعلان شي

د پاکستان مرکزي حکومت ویلي چې د تحریک انصاف له لوري د لاریون د پیل له امله د حکومت او مخالف ګوند ترمنځ خبرې له ناکامۍ سره مخ شوې دي؛ خو تحریک انصاف د خبرو د ناکامۍ پړه پر مرکزي حکومت اچوي. دواړه لوري د خبرو د ناکامېدو د لاملونو په اړه بېلابېل دریځونه لري