د طالبانو د پکتیا والي: «افغانان مو شریعت ته برابر کړي او اخرت مو ورته سم کړی

اشتراک گذاری:

د طالبانو د پکتیا والي مهرالله حماد ادعا کوي چې د دې ډلې د واکمنۍ له امله د افغانستان خلک دې ته چمتو شوي چې د شریعت له مخې ژوند وکړي او ځان د اخرت له عذابه وژغوري. نوموړي ویلي چې په پکتیا کې یې د طالبانو د «امر بالمعروف» قانون پر ټولو دولتي کارکوونکو سل سلنه پلی کړی دی.

بریانیوز- چهارشنبه، ١٥ میزان ١٤٠٥

د طالبانو د پکتیا ولایت د دفتر د خبرپاڼې له مخې، مهرالله حماد دا څرګندونې د «امر بالمعروف قانون» د تطبیق د څارنې کمېټې په نوبتي غونډه کې کړې دي.

حماد ویلي چې د طالبانو له واکمنېدو وروسته د افغانستان خلک د شریعت مطابق ژوند کولو ته چمتو شوي او هڅه کوي چې ځان د اخرت له عذابه وژغوري.

نوموړي زیاته کړې چې په پکتیا کې یې د «امر بالمعروف او نهی عن المنکر» قانون پر ټولو دولتي کارکوونکو «سل سلنه» پلی کړی دی.

د طالبانو د «امر بالمعروف او نهی عن المنکر» قانون د دې ډلې له بیا واکمنېدو وروسته له هغو قوانینو څخه دی چې پر عامه ژوند، په ځانګړي ډول د ښځو او نجونو پر حضور او فعالیتونو، پراخ محدودیتونه وضع کوي. د طالبانو مشر ملا هبت‌الله اخوندزاده د دغه قانون پلي کول د خپلې ادارې له مهمو مسوولیتونو څخه بللي او ویلي یې دي چې د طالبانو د جګړې له ځانګړو موخو څخه یوه هم د امر بالمعروف او نهی عن المنکر پلي کول وو.

د طالبانو د مشر د لارښوونو له مخې، په ولایتونو کې د دغه قانون د تطبیق د څارنې لپاره د والیانو په مشرۍ منظمې غونډې هم ترسره کېږي.