په غزه کې د بارانونو له امله د فلسطیني بې‌ځایه شویو زرګونه خیمې لوېدلې؛ بشري ناورین لا ژور شو

په غزه کې د ژمي درنې بارانونه د هغو فلسطینیانو حالت لا پسې خراب کړی چې له میاشتو راهیسې په لنډمهالو کمپونو کې د خیمو تر سیوري لاندې ژوند کوي. د سیمې د چارواکو په وینا، د بارانونو له امله له ۲۲ زرو ډېرې خیمې ویجاړې شوې او زرګونه نورې د کار وړ پاتې نه دي

 خرابېدونکې وضعیت؛ د انسانیت د تحمل حد

د غزې د دولتي اطلاعاتو د دفتر مشر اسماعیل الثوابته ویلي چې د سیمې بشري حالت ورځ تر بلې د اندېښنې وړ ګرځي

نوموړي زیاته کړې:

د بارانونو د پرلپسې ورښت او د لومړنیو امکاناتو د نشتون له امله لسګونه زره خیمې زیانمنې شوې. د خلکو کمپلې، عایقي پوښونه او نور ضروري شیان هم له منځه تللي دي

 ۱.۵ میلیونه آواره د ژوند له سختو شرایطو سره مخ

د چارواکو د معلوماتو له مخې، نږدې یو نیم میلیون فلسطینیان په زړو، لوند او نیمه ویجاړو خیمو کې ژوند کوي—په داسې حال کې چې نه کافي سرپناه شته، نه تودوخه، نه د ژوند لومړني اړتیاوې

ډېری کورنۍ د باران له امله په شپه کې له خیمو بهر پاتې شوي او ماشومانو او زاړه کسانو ته د ناروغیو خطر په چټکۍ سره لوړ شوی

 بشري ټولنې د عاجل مرستو غوښتنه کوي

د سیمه‌ییزو ادارو په وینا، د خیمو د ویجاړېدلو او د ژمي د سختې هوا له امله د خلکو اړتیاوې څو برابره شوې دي. بیړنۍ اړتیاوې پدې ډول دي:

خوندي او وچې خیمې

د تودوخې وسایل

کمپلې او حرارتي پوښونه

د پاکو اوبو او خوړو زیات عرضه

عاجله طبي مرسته او درمل

د بارانونو دوام او د خیمو تخریب د غزې له مخکې نه سخت انساني ناورین لا پسې ژور کړی. د نړیوالو مرستندویو سازمانونو غوښتنه دا ده چې د آوارګانو د ژغورنې لپاره باید بېړني اقدام وشي، ځکه هره ورځ د انسانانو ژوند له خطر سره مخامخ دی