پاکستان له ۱۲۰۰ زیات افغان کډوال په یوه ورځ کې په زوره ایستلي دي

بریانیوز:(سه شنبه۱۶جدی۱۴۰۴) د طالبانو د کډوالو او راستنېدونکو چارو کمیسیون ویلي، چې ډېری ایستل شوي کسان هغه کورنۍ دي چې له کلونو راهیسې په پاکستان کې اوسېدې او په ناڅاپي ډول له نیولو او فشار وروسته د وتلو ته اړ شوي دي. د یاد کمیسیون په وینا، په تورخم کې د ایستل شوو کډوالو شمېر تر سپین‌بولدک زیات و، خو دواړو لارو ته رسېدلي کسان له سختو بشري ستونزو سره مخ دي

د جبري ستنېدو لوړه شمېره

د طالبانو د عالي کمیسیون د معلوماتو له مخې، د روان کال د لړم (آبان) له لومړۍ نېټې راهیسې تر اوسه پورې، پاکستان ټولټال ۳۵۷ زره او ۶۰۷ افغان کډوال په جبري ډول افغانستان ته ستانه کړي دي. دا شمېر د تېرو لسیزو په پرتله بې‌ساری بلل کېږي او د بشري بنسټونو جدي اندېښنې یې راپارولي دي

چارواکي وایي، ډېری ستانه شوي کډوال د سرپناه، کار، روغتیايي خدمتونو او خوراکي توکو له سخت کمښت سره مخ دي، په ځانګړي ډول ښځې، ماشومان او زاړه کسان چې د ژمي په سړې هوا کې له جدي خطرونو سره لاس او ګرېوان دي

بشري اندېښنې او نړیوال غبرګون

د کډوالو چارو شنونکي وایي، د پاکستان له لوري د افغان کډوالو جبري ایستل د نړیوالو بشري اصولو او د کډوالو د حقونو له نړیوالو کنوانسیونونو سره په ټکر کې دي. د هغوی په باور، دا چاره نه یوازې د افغانستان پر نازک اقتصادي او ټولنیز وضعیت نور فشار زیاتوي، بلکې د ستانه شوو کسانو د ژوند راتلونکی هم له ناڅرګند برخلیک سره مخ کوي

نړیوالو بشري ادارو څو ځله خبرداری ورکړی چې د افغان کډوالو جبري ستنول باید ودرول شي او د کډوالو د راستنېدو بهیر باید داوطلبانه، خوندي او باعزته وي

د طالبانو دریځ

د طالبانو حکومت ویلي چې هڅه کوي د راستنېدونکو کډوالو لپاره د لومړنیو مرستو زمینه برابره کړي، خو ټینګار یې کړی چې د دومره لوی شمېر خلکو ناڅاپي راستنېدل د افغانستان د محدودو امکاناتو لپاره ستره ننګونه ده.

د چارواکو په وینا، که د جبري ایستلو لړۍ همداسې دوام وکړي، نو دا به د هېواد پر بشري وضعیت ناوړه اغېزې ولري او نړیواله ټولنه باید په دې برخه کې خپل مسئولیت ادا کړي