پوهاند عبدالسلام عظيمي، د افغانستان له نوموتو حقوقپوهانو، د سترې محکمې پخوانی مشر

پوهاند عبدالسلام عظيمي، د افغانستان له نوموتو حقوقپوهانو، د سترې محکمې پخوانی مشر او د اساسي قانون د تدوين د کمېسيون مهم غړی، د ۹۰ کلونو په عمر د ترکيې په هېواد کې له دې فاني نړۍ سترګې پټې کړې

عبدالسلام عظيمي د افغانستان د معاصر حقوقي نظام له بنسټګرو څېرو څخه شمېرل کېده. هغه د ۲۰۰۴ کال د اساسي قانون د تدوين په بهير کې فعاله ونډه لرله او د قانون حاکميت، د قضا خپلواکي او عدلي عدالت د ټينګښت لپاره يې مهم رول ادا کړ. عظيمي له ۲۰۰۶ څخه تر ۲۰۱۴ کال پورې د افغانستان د سترې محکمې د رئيس په توګه دنده ترسره کړه او د هېواد د عالي قضايي بنسټ مشري يې پر غاړه لرله

نوموړی د مصر د الازهر پوهنتون فارغ و او د اسلامي او مدني حقوقو په برخو کې يې ژوره علمي پوهه لرله. هغه د کابل پوهنتون او د امريکا د نبراسکا پوهنتون استاد پاتې شوی او د حقوقو په روزنه او علمي څېړنو کې يې لسګونه کلونه خدمت کړی دی. د هغه ګڼ شمېر علمي اثار او ليکنې د افغانستان د حقوقي زده کړو او قضايي تفکر لپاره ارزښتناک ميراث بلل کېږي

پوهاند عظيمي د خپل مسلکي ژوند په اوږدو کې د قانون د حاکميت، عدلي انصاف او ملي ګټو د ساتنې پلوی و او د سياسي فشارونو پر وړاندې د قضا خپلواکي يې يوه اساسي ارزښت ګڼله. د حقوقي ټولنې ډېری غړي هغه د اعتدال، علم، وقار او ملي مسؤليت سمبول بولي.

د عبدالسلام عظيمي مړينه د افغانستان د حقوقي او علمي ټولنې لپاره لويه ضايعه بلل کېږي. د هغه ياد، خدمتونه او علمي ميراث به د هېواد په عدلي او حقوقي تاريخ کې تلپاتې پاتې شي