په ایران کې نوې نیونې؛ د «اصلاحاتو جبهې» مشره آذر منصوري او دوه نور مخکښ سیاستوال ونیول شول

په ایران کې نوې نیونې؛ د «اصلاحاتو جبهې» مشره آذر منصوري او دوه نور مخکښ سیاستوال ونیول شول 

بریانیوز:(دوشنبه،۲۰ دلو۱۴۰۴) 

د ایران حکومت په یوه تازه اقدام کې د «اصلاحاتو جبهې» مشره آذر منصوري په ګډون درې مخکښ سیاستوال د هېواد د سیاسي نظم د ګډوډولو په تور نیولي دي. ایراني رسنیو راپور ورکړی، چې دغه کسان د امنیتي بنسټونو له لوري د ځانګړو عملیاتو پر مهال نیول شوي دي

د ایران د امنیتي او قضایي چارواکو په وینا، پر یادو سیاستوالو تور دی چې د جنورۍ میاشتې د خونړیو لاریونونو پر مهال یې د امریکا او اسرائیل په ګټه فعالیتونه کول او هڅه یې کوله چې عامه ناارامي لا پسې پراخه کړي. چارواکي وایي، دا کړنې د هېواد د ملي امنیت پر ضد بلل کېږي

دا نیونې په داسې حال کې ترسره کېږي، چې په ایران کې د تېرې میاشتې د پراخو ناارامیو پر مهال د زرګونو کسانو د وژل کېدو راپورونو ولسي غوسه پارولې ده. د بشري حقونو یو شمېر بنسټونه ادعا کوي، چې په دغو اعتراضونو کې ګڼ ملکي وګړي وژل شوي او زرګونه نور نیول شوي دي، خو ایراني چارواکي د دې شمېرو کره‌والی ردوي

سیاسي شنونکي وایي، د اصلاح‌طلبو څېرو نیول ښيي چې د ایران حکومت هڅه کوي د کورنیو فشارونو او پراخو اعتراضونو پر وړاندې خپل کنټرول ټینګ کړي. د دوی په باور، دا ډول اقدامات ښايي د حکومت او اصلاح‌طلبو جریانونو ترمنځ سیاسي کړکېچ لا پسې ژور کړي

له بلې خوا، دا پرمختګونه په داسې حساس وخت کې رامنځته شوي، چې د ایران او امریکا ترمنځ سیاسي او پوځي ترینګلتیا هم لوړې کچې ته رسېدلې ده. وروستیو ورځو کې د دواړو لورو ترمنځ د متقابلو ګواښونو زیاتېدو د سیمې د امنیت په اړه اندېښنې زیاتې کړې دي

کارپوهان خبرداری ورکوي، که د کورنیو ناارامیو ترڅنګ بهرني فشارونه هم دوام ومومي، نو ایران به له یوه پېچلي سیاسي او امنیتي وضعیت سره مخ شي. تر اوسه د نیول شویو سیاستوالو له لوري یا د هغوی د کورنیو له خوا رسمي غبرګون نه دی خپور شوی