کابل – طالبان: ازبکستان به د درملو په برخه کې د پاکستان بشپړ بدیل شي

اشتراک گذاری:

بریانیوز:(چهارشنبه، ۲۹ دلو۱۴۰۴)

کابل – د طالبانو ادارې اعلان کړی چې افغانستان په پام کې لري ازبکستان د درملو د اصلي سرچینې په توګه وټاکي او په دې برخه کې به ورو ورو د پاکستان پر وارداتو تکیه پای ته ورسوي. د طالبانو د عامې روغتیا او سوداګرۍ اړوند چارواکو ویلي، له ازبکستاني لوري سره خبرې وروستي پړاو ته رسېدلې او تمه ده په نږدې راتلونکې کې عملي ګامونه واخیستل شي

چارواکي وايي، په تېرو کلونو کې د سرحدي ستونزو او لوژستیکي خنډونو له امله د درملو عرضه ځینې وختونه له ځنډ او کمښت سره مخ شوې ده. د دوی په وینا، د شمالي لارې فعالول به نه یوازې د درملو بازار ته ثبات ورکړي، بلکې د بیو د کنټرول او کیفیت د ښه والي زمینه به هم برابره کړي

د طالبانو ویاندانو ټینګار کړی چې ازبکستان له تخنیکي پلوه د درمل جوړونې په برخه کې پرمختللی سکتور لري او کولی شي د افغانستان اړتیاوې پوره کړي. دوی زیاتوي چې دواړه لوري د مستقیمو وارداتو ترڅنګ په افغانستان کې د ګډو تولیدي فابریکو پر جوړولو هم خبرې کوي

اقتصادي شنونکي باور لري چې که دا پلان عملي شي، د افغانستان د وارداتو جغرافیه به بدله شي او هېواد به له یوې لارې پر ځای له څو لارو درمل ترلاسه کړي. خو دوی وايي چې بشپړ بدلون وخت ته اړتیا لري، ځکه د کلونو راهیسې د افغانستان د درملو لویه برخه له پاکستانه واردېده

د کابل دا اعلان په داسې حال کې کېږي چې افغانستان هڅه کوي له منځنۍ اسیا هېوادونو سره خپلې اقتصادي اړیکې پراخې کړي او د سوداګرۍ په برخه کې متوازن سیاست خپل کړي