کابل کې د افغانستان–چین خبرې؛ د همکاریو او مذاکراتو پر دوام ټینګار

                                                                                                          کابل کې د افغانستان–چین خبرې؛ د همکاریو او مذاکراتو پر دوام ټینګار

                                                                                                                                                   بریا نیوز( چهارشنبه، ١٩ حمل ١٤٠٥) 

د طالبانو د حکومت د بهرنیو چارو وزارت ویلي چې د بهرنیو چارو وزیر امیر خان متقي په کابل کې د چین ولسي جمهوریت له سفیر ژاو شینګ سره لیدلي او د دواړو هېوادونو ترمنځ پر مهمو موضوعاتو یې خبرې کړې دي

د یاد وزارت په وینا، په دې کتنه کې د افغانستان او چین ترمنځ پر دوه اړخیزو همکاریو، سیمه‌ییزو بدلونونو او همداراز د اورمچي ښار کې د روانو مذاکراتو پر بهیر مفصل بحث او د نظر تبادله شوې ده

د اعلامیې له مخې، امیر خان متقي ویلي چې تر دې دمه په اورمچي کې ترسره شوې خبرې «ګټورې» دي او هیله یې څرګنده کړې چې جزئي اختلافات یا تعبیرات د مذاکراتو د پرمختګ خنډ ونه ګرځي. نوموړي ټینګار کړی چې دوامداره ډیپلوماټیک تعامل د سیمه‌ییز ثبات او اقتصادي همکاریو لپاره مهم دی

بل لور ته، د چین استازي هم د دواړو هېوادونو ترمنځ د اړیکو پر پراختیا ټینګار کړی او ویلي یې دي چې بیجینګ د افغانستان له اوسني وضعیت سره د رغنده تعامل ملاتړ کوي

شنونکي باور لري چې دا ډول لیدنې د افغانستان لپاره مهمې دي، ځکه چین د سیمې یو مهم اقتصادي او سیاسي ځواک دی او کولی شي د زیربنایي پروژو او سوداګرۍ په برخه کې مهم رول ولوبوي

په ټوله کې، دا خبرې ښيي چې د افغانستان او چین ترمنځ اړیکې د پیاوړتیا په حال کې دي، او دواړه لوري هڅه کوي چې د روانو سیمه‌ییزو بدلونونو په رڼا کې خپل تعاملات لا پراخ کړي