ریچارډ بېنېټ: په افغانستان کې د «جنسیتي اپارتاید» د رسمیت پېژندنې لپاره دې نړیوالې هڅې دوام ومومي

ریچارډ بېنېټ: په افغانستان کې د «جنسیتي اپارتاید» د رسمیت پېژندنې لپاره دې نړیوالې هڅې دوام ومومي

    بریانیوز( پنجشنبه، ١۷ ثور ١٤٠٥)

د افغانستان لپاره د ملګرو ملتونو ځانګړي راپور ورکوونکي،ریچارډ بېنېټ ، د فرانسې په ملي شورا کې د خپلې وینا پر مهال غوښتنه کړې چې په افغانستان کې د «جنسیتي اپارتاید» د رسمیت پېژندنې لپاره دې نړیوالې هڅې لا پیاوړې شي

بېنېټ ویلي، په افغانستان کې د بشري حقونو وضعیت، په ځانګړي ډول د ښځو او نجونو پر وړاندې سخت محدودیتونه، د نړیوالې ټولنې جدي او بېړنۍ پاملرنې ته اړتیا لري. د هغه په وینا، افغان ښځې له زده‌کړو، کار، ټولنیز حضور او ګڼو اساسي حقونو محرومې شوې دي چې دا چاره د بشري حقونو له نړیوالو اصولو سره په ټکر کې ده

هغه ټینګار کړی چې نړیواله ټولنه باید د افغان ښځو د حقونو د خوندیتوب لپاره واحد او قوي دریځ غوره کړي او پر هغو پالیسیو فشار زیات کړي چې د ښځو ازادۍ او اساسي حقونه محدودوي

ریچارډ بېنېټ همداراز ویلي چې د افغانستان بشري وضعیت یوازې یوه کورنۍ مسئله نه ده، بلکې نړیوال مسوولیت ګڼل کېږي او د افغان ښځو غږ باید په نړیوالو فورمونو کې واورېدل شي

په وروستیو کلونو کې د ښځو د زده‌کړو، کار او ټولنیزو فعالیتونو په تړاو محدودیتونو د نړیوالو سازمانونو او بشري حقونو د بنسټونو پراخ غبرګونونه راپارولي دي. ګڼو نړیوالو بنسټونو له افغان چارواکو غوښتي چې د ښځو او نجونو پر وړاندې محدودیتونه لرې او هغوی ته د اساسي حقونو زمینه برابره کړي