ورزش

د ایران د فوټبال مشر: نړیوال جام د فیفا سیالۍ دي، نه د ټرمپ او امریکا

اشتراک گذاری:

بریانیوز (جمعه، ١۸ ثور ١٤٠٥)

د ایران د فوټبال فدراسیون مشر د ۲۰۲۶ نړیوال جام په تړاو روانو سیاسي ترینګلتیاوو ته په اشارې ویلي، د نړیوال جام اصلي کوربه فیفا دی، نه د امریکا ولسمشر ټرمپ او نه هم متحده ایالات

هغه ټینګار کړی چې که د ایران ملي فوټبال لوبډله د نړیوال جام سیالیو لپاره امریکا ته سفر کوي، نو باید د ایران له ارزښتونو او د اسلامي انقلابي ګارډ له مقام سره درناوی وشي

د نوموړي دغو څرګندونو په داسې وخت کې پام ځانته اړولی چې د ایران او امریکا ترمنځ سیاسي او پوځي ترینګلتیا لا هم روانه ده، او د سیمې وضعیت د اسرائیل او ایران د احتمالي پراخې جګړې له امله خورا حساس بلل کېږي

تر اوسه د ایران د ملي لوبډلې د نړیوال جام په سیالیو کې د ګډون څرنګوالی په بشپړه توګه روښانه نه دی، ځکه د امریکا ویزې، امنیتي شرایط او د دواړو هېوادونو اړیکې د بحث مهم موضوعات ګرځېدلي دي

شنونکي وایي، که سیمه‌ییز کړکېچ نور هم پراخ شي، ښایي د ورزش او سیاست ترمنځ واټن لا کم شي او د نړیوال جام پر فضا هم مستقیم اغېز وکړي. خو فيفا تل ټینګار کړی چې ورزش باید له سیاسي شخړو جلا پاتې شي او ټولې لوبډلې باید د نړیوالو اصولو له مخې په ازاد ډول سیالیو کې برخه واخلي