په کندز کې د سرو زرو ستره پروژه؛ ۲۰.۲ میلیونه ډالري تړون د اقتصادي هيلو نوې څپه را وپاروله

په کندز کې د سرو زرو ستره پروژه؛ ۲۰.۲ میلیونه ډالري تړون د اقتصادي هيلو نوې څپه را وپاروله

  بریا نیوز (دوشنبه،۲۱ثور ۱۴۰۵)

د طالبانو حکومت اعلان کړی چې د هېواد په شمالي ولایت کندز کې د سرو زرو د استخراج لپاره د ۲۰.۲ میلیونه ډالرو په ارزښت یو مهم او ستر قرارداد لاسلیک شوی

چې د اقتصادي پیاوړتیا او د طبیعي زیرمو د اغېزمنې استفادې په برخه کې یو نوی باب پرانیزي

د طالبانو چارواکو ویلي، دا پروژه به د هېواد د کانونو له پټو خزانو څخه د ګټې اخیستنې په لاره کې یو مهم ګام وي او د ملي اقتصاد د ودې لپاره به تازه انرژي ورکړي. د دوی په وینا، د کانونو سکتور د افغانستان د ځان‌بساینې په لور تر ټولو قوي تکیه بلل کېږي

دغه ستره پروژه د کندز ولایت په هغو سیمو کې عملي کېږي چې د سرو زرو غني زیرمې لري

چارواکو ډاډ ورکړی چې د استخراج بهیر به د معیاري تخنیکي اصولو، شفافو پروسو او اقتصادي معیارونو پر بنسټ پر مخ ولاړ شي، څو د هېواد د طبیعي شتمنیو سم مدیریت یقیني شي

د اقتصادي چارو شنونکي وایي، دا ډول لویې پانګونې نه یوازې د ملي عوایدو د زیاتېدو لامل ګرځي، بلکې زرګونو کسانو ته د کار زمینه هم برابروي او د سیمه‌ییزو ټولنو د ژوند بڼه بدلوي

د دوی په وینا، د کانونو سم مدیریت کولی شي افغانستان د اقتصادي پرمختګ نوې مرحلې ته ورسوي

په ورته وخت کې د هېواد دننه خلک د دې ډول پروژو هرکلی کوي او هیله لري چې د طبیعي زیرمو د استخراج له لارې د بې‌کارۍ کچه راټیټه او د اقتصادي ثبات فضا پیاوړې شي

دغه قرارداد داسې مهال لاسلیک کېږي چې افغانستان د اقتصادي بدلونونو او پراخو فرصتونو په پوله ولاړ دی، او د کانونو سکتور د هېواد د راتلونکي لپاره د امید یو ځلاند څراغ ګڼل کېږي