بلال سروري: د ښځو پر وړاندې محدودیتونه د افغانانو عزت او وقار زیانمنوي

اشتراک گذاری:

افغان خبریال او لیکوال بلال سروري وایي، د افغان ښځو سپکاوی او محدودول د افغانانو له عزت او وقار سره تړلې موضوع ده او د خلکو لپاره د منلو وړ نه ده.

بریانیوز- یکشنبه ٢٤ جوز ١٤٠٥

بلال سروري د افغان ښځو پر وړاندې د طالبانو د وروستیو اقداماتو په اړه ویلي چې د دغو کړنو له امله د افغانانو د عزت، وقار او ناموس احساس ته جدي زیان رسېدلی دی.

نوموړي په یوه څرګندونه کې ټینګار کړی چې په افغان ټولنه کې د ښځو سپکاوی، نیول او زنداني کول د خلکو لپاره د منلو وړ نه دي، ځکه دا موضوع د افغانانو له عزت او ټولنیزو ارزښتونو سره نېغ تړاو لري.

سروري ویلي چې طالبانو د خلکو غوښتنو او اندېښنو ته پام نه دی کړی، بلکې داسې وضعیت یې رامنځته کړی چې ډېری افغانان په خپل هېواد کې د بې وسۍ او ناهیلۍ احساس کوي.

هغه پر طالبانو نیوکه کړې چې د کار، زده کړو او فردي ازادیو په څېر اساسي غوښتنو ته یې مناسب ځواب نه دی ورکړی او پر ځای یې د محدودیتونو او فشارونو سیاست غوره کړی دی.

د نوموړي په وینا، تاریخ ښيي چې هغه واکمنۍ چې پر زور، انحصار او د خلکو له ارادې پرته ولاړې وي، دوام نه شي موندلی او بالاخره د ولس او تاریخ له قضاوت سره مخامخ کېږي.

دا څرګندونې په داسې حال کې شوې دي چې ګڼ شمېر افغانانو د طالبانو د وروستیو تګلارو او کړنو پر ضد خپل اعتراض او مخالفت څرګند کړی او د دغو اعتراضونو د پراخېدو غوښتنه یې کړې ده.