سلګونه افغان خبریالان جلاوطنۍ ته اړ شوي، د رسنیو وضعیت لا هم کړکېچن دی

اشتراک گذاری:

بریانیوز- شنبه ۳۰ جوز ١٤٠٥

د بې پولې خبریالانو سازمان ویلي چې د ۲۰۲۱ کال د اګست له ۱۵مې وروسته په افغانستان کې د رسنیو د وضعیت د خرابېدو له امله سلګونه خبریالان اړ شوي چې له هېواده ووځي

د دغه سازمان د راپور له مخې، ټولټال ۶۷۷ افغان خبریالان د ملاتړ له پروګرامونو څخه په استفادې جلاوطنۍ ته تللي، چې دا د یاد سازمان د مرستندویه قضیو یوه لویه برخه جوړوي او د افغان رسنیز چاپېریال د کړکېچ شدت ښيي

راپور زیاتوي چې په ۲۰۲۲ کال کې ۱۸۳ خبریالان له افغانستانه وتلي وو او یوازې په ۲۰۲۵ کال کې هم ۸۲ نور خبریالان د امنیتي او اقتصادي فشارونو له امله جلاوطنۍ ته اړ شوي دي

خبرداری ورکړی چې د افغان خبریالانو ستونزې یوازې تر افغانستان پورې محدودې نه دي، بلکې ډېری یې په نورو هېوادونو کې هم له ناڅرګند او ناامن وضعیت سره مخ دي. د راپور له مخې، په پاکستان کې د افغان کډوالو د جبري ایستلو د پالیسیو له امله لږ تر لږه ۵۰ افغان خبریالان بېرته افغانستان ته ستانه کړل شوي دي

دغه سازمان همدارنګه ویلي چې اوس هم په افغانستان کې لږ تر لږه ۵ خبریالان د طالبانو په بندخونو کې بندیان دي او نور خبریالان د بند، فشار او یا د خپل مسلک پرېښودو له جدي خطر سره مخ دي

شنونکي وایي چې دا وضعیت د افغانستان د رسنیو د ازادۍ، د معلوماتو د لاسرسي او د خبریالانو د خوندیتوب لپاره جدي ننګونه جوړوي