نیویارک – د افغانستان ثبات د ملګرو ملتونو او شانګهای همکاریو ټولنې د لوړې کچې خبرو مهم محور و

نیویارک – د افغانستان ثبات د ملګرو ملتونو او شانګهای همکاریو ټولنې د لوړې کچې خبرو مهم محور و

بریانیوز-دوشنبه ۸ سرطان ١٤٠٥

نیویارک – د شانګهای همکاریو ټولنې  سرمنشي ویلي، چې د دې ټولنې او د ملګرو ملتونو د سرمنشي ترمنځ د څلورم پړاو مشورتي غونډه کې د افغانستان وضعیت، د سولې او ثبات د ټینګښت لپاره ګډې هڅې او سیمه‌ ییزې همکارۍ د بحثونو له مهمو موضوعاتو څخه وې

د نوموړي په وینا، دغه غونډه د جون په ۲۶مه د ملګرو ملتونو په مرکزي دفتر، نیویارک کې ترسره شوې، چې دواړو لورو پکې د نړیوالو او سیمه‌ییزو همکاریو د پراختیا او د ګډو ننګونو د حل په اړه خپل نظرونه شریک کړل

د راپور له مخې، د ملګرو ملتونو پلاوي د «اقلیم، سوله او امنیت» تر سرلیک لاندې د خپلو فعالیتونو په اړه معلومات وړاندې کړل او د افغانستان د ثبات، بشري وضعیت او له منځنۍ اسیا هېوادونو سره د دوامدارې سولې او امنیت د پیاوړتیا لپاره یې د روانو هڅو جزییات شریک کړل

بل لور ته، د شانګهای همکاریو ټولنې استازو د سازمان د راتلونکې سرمشریزې د چمتووالي، د قرغزستان د دوراني ریاست د غونډو د پایلو او د سازمان د اصلاحاتي پروګرامونو په اړه معلومات وړاندې کړل

د شانګهای همکاریو ټولنې سرمنشي ټینګار کړی چې یادې مشورې په رغنده او مثبت چاپېریال کې ترسره شوې او دواړو خواوو د افغانستان او سیمې د ثبات، امنیت او پراخو همکاریو پر دوام ټینګار وکړ

شنونکي باور لري چې د افغانستان په اړه د ملګرو ملتونو او شانګهای همکاریو ټولنې دوامدارې مشورې د دې ښکارندويي کوي چې د افغانستان ثبات لا هم د سیمې او نړیوالو سازمانونو د اجنډا له مهمو لومړیتوبونو څخه ګڼل کېږي