مقاله

راپور: د طالبانو په اقتصادي جوړښت کې د حاجي بشر نورزي د نفوذ په اړه نوې ادعاوې

اشتراک گذاری:

بریانیوز- پنجشنبه ١۱ سرطان ١٤٠٥

حاجي بشر نورزی د افغانستان د کانونو، نفتو او سوداګریزو فعالیتونو په مهمو برخو کې پراخ نفوذ لري او د بدخشان او تخار د سرو زرو کانونو، د شمال د نفتو په ځینو اقتصادي پروژو او له چینایي شرکتونو سره د کانونو په یو شمېر تړونونو کې ښکېل دی

د بدخشان د سرو زرو په کانونو کې یوې بوختې سرچینې، چې ویلي یې دي له کندهار سره تړاو لري، ادعا کړې چې نورزی د کانونو په مهمو قراردادونو او اقتصادي پروژو کې فعاله ونډه لري

همدارنګه، یوه طالب چارواکي، چې د سرچینې په وینا د طالبانو د کانونو او پټرولیم له وزیر هدایت‌الله بدري او حاجي بشر نورزي سره یې بدخشان ته ګډ سفرونه کړي، ادعا کړې چې د نورزي د سفرونو پر مهال د طالبانو د دفاع وزیر ملا یعقوب هغه ته د تګ راتګ لپاره چورلکه برابروي

یادې سرچینې دا هم ویلي چې حاجي بشر نورزی یوازې د کانونو په رسمي قراردادونو کې نه، بلکې د حیرتان بندر له لارې د روسیې او ترکمنستان د تېلو د واردولو په بهیر کې هم نفوذ لري

سرچینې دا ادعا هم مطرح کړې چې د حاجي بشر نورزي یو زوی د سرو زرو په قاچاق کې رول لري او د سرو زرو یوه برخه په زرهي موټرو کې د کندهار له لارې پاکستان ته لېږدول کېږي. د دغو ادعاوو په اړه تر اوسه خپلواکې سرچینې یا اړوندو لورو رسمي غبرګون نه دی خپور کړی

د سرچینو په وینا، د کانونو او نفتو په برخه کې د حاجي بشر نورزي ځینې خپلسرې کړنې د دې لامل شوې چې د طالبانو مشر ملا هبت‌الله اخوندزاده د کانونو د مدیریت په تړاو د نویو پرېکړو پر ارزونه بوخت شي او د ځینو اشخاصو د واک محدودولو په اړه ګامونه واخلي

په همدې وروستیو کې ملا هبت‌الله اخوندزاده د کانونو او د سرو زرو د مینځنې په اړه یو فرمان هم صادر کړی، چې پکې ځینې محدودیتونه وضع شوي دي. خو د خپاره شوي فرمان له متن څخه داسې کومه څرګنده ماده نه ښکاري چې د حاجي بشر نورزي فعالیتونه په مستقیم ډول محدود کړي. د فرمان له مخې، د کانونو قراردادونه د طالبانو د کانونو او پټرولیم وزارت له لارې تنظیمېږي؛ هغه وزارت چې مشري یې هدایت‌الله بدري کوي

تر اوسه د طالبانو حکومت، د کانونو او پټرولیم وزارت، حاجي بشر نورزي او نور یاد شوي کسان د دغو ادعاوو په اړه رسمي غبرګون نه دی ښودلی، او دا معلومات په خپلواکه توګه نه دي تایید شوي