پاکستان: که له افغان خاورې بریدونه دوام وکړي، بیا به پوځي اقدام وکړو

پاکستان: که له افغان خاورې بریدونه دوام وکړي، بیا به پوځي اقدام وکړو

بریانیوز- جمعه، ١٢ سرطان ١٤٠٥

د پاکستان د بهرنیو چارو وزارت ویاند خبرداری ورکړی چې که د پاکستان پر ضد بریدونه له افغان خاورې دوام ومومي، اسلام‌اباد به یو ځل بیا د خپلو امنیتي ګټو د خوندي کولو لپاره اقدام وکړي

د نوموړي په وینا، پاکستان له اوږدې مودې راهیسې له افغان لوري غواړي چې خپله خاوره د هغو وسله‌والو ډلو د فعالیت لپاره ونه کارول شي چې د پاکستان امنیت ته ګواښ پېښوي. هغه ټینګار وکړ چې د اسلام‌اباد لومړیتوب د سرحدي امنیت ساتل او د هر ډول احتمالي بریدونو مخنیوی دی

د پاکستان د بهرنیو چارو وزارت ویاند زیاته کړه، که د پولې هاخوا څخه د وسله‌والو بریدونو لړۍ ونه درېږي، هېواد یې د خپلو ملي ګټو د دفاع لپاره د بیا اقدام حق له ځانه سره محفوظ ګڼي

دا څرګندونې داسې مهال کېږي چې د افغانستان او پاکستان ترمنځ د سرحدي امنیت، د وسله‌والو ډلو د فعالیتونو او دوه اړخیزو اړیکو پر سر ترینګلتیا لا هم پر خپل ځای پاتې ده. دواړو هېوادونو په تېرو میاشتو کې څو ځله د یو بل پر ضد تورونه لګولي دي

بلخوا، د طالبانو حکومت تر دې وړاندې د پاکستان ورته ادعاوې رد کړې او ټینګار یې کړی چې د افغانستان خاوره به د هېڅ هېواد پر ضد د ګواښ او برید لپاره ونه کارول شي

سیاسي شنونکي وایي، د دواړو هېوادونو ترمنځ د لفظي خبرداریو دوام ښيي چې د سرحدي امنیت مسئله لا هم د کابل او اسلام‌اباد د اړیکو له مهمو او حساسو موضوعاتو څخه ده، او د تاوتریخوالي د کمېدو لپاره د ډیپلوماټیکو هڅو دوام اړین ګڼل کېږي