سیاست

محسن رضايي: د سمندري محاصرې د دوام په صورت کې به د امریکا اقتصادي ګټې په نښه کړو

اشتراک گذاری:

بریانیوز شنبه ( ۷/ سنبله /۱۴۰۵هـ.ش)

تهران — د ایران د ملي امنیت عالي شورا منشي محسن رضايي خبرداری ورکړی چې که پر ایران سمندري محاصره دوام وکړي، تهران به د امریکا اقتصادي ګټې په «شدت او ځواک» سره په نښه کړي

رضايي په یوه مرکه کې ویلي، ایران د اوربند پر مهال سمندري محاصره ماته کړې او د همدې مودې په جریان کې یې د شاوخوا ۷۰ تر ۸۰ میلیونه بېرله تېلو د صادرولو توان پیدا کړی دی.

نوموړي ادعا کړې چې د ایران د تېلو پلور بېرته د بندیزونو له پلي کېدو مخکې کچې ته رسېدلی او هېواد یې د تېلو د صادراتو لپاره نوې لارې هم رامنځته کړې دي

رضايي ویلي، که سمندري محاصره بیا هم دوام ومومي، د ایران غبرګون به یوازې په سیاسي دریځونو محدود نه وي، بلکې د امریکا اقتصادي ګټې به هم د تهران د احتمالي اقداماتو په ډله کې شاملې وي

د ایران او امریکا ترمنځ د کړکېچ د زیاتېدو په ترڅ کې د سمندري تګ راتګ او د تېلو صادراتو موضوع د دواړو لورو ترمنځ د اختلاف له مهمو محورونو څخه ګرځېدلې ده. تهران ټینګار کوي چې د اقتصادي فشارونو او محاصرې پر وړاندې به د خپل اقتصادي فعالیت د دوام لپاره بدیلې لارې وکاروي