اقتصاد

ټاپي پروژه : هرات د ترکمنستان د ګازو د ترلاسه کولو په درشل کې؛ د ټاپي پروژه د سوداګریزو پېرودونو پړاو ته نږدې شوې

اشتراک گذاری:

بریانیوز شنبه ( ۷/ سنبله /۱۴۰۵هـ.ش)

هرات — د ترکمنستان، افغانستان، پاکستان او هند ترمنځ د طبیعي ګازو د لېږد د ټاپي پایپ‌لاین پروژه، چې له کلونو ځنډ وروسته اوس د افغانستان په لوېدیځ کې د عملي کېدو نوي پړاو ته رسېدلې، تمه ده هرات ته د ترکمنستان د ګازو د رسولو زمینه برابره کړي

د هرات سیمه‌ییز چارواکي وايي، د ټاپي پایپ‌لاین د هرات برخې د پاتې کارونو بشپړېدل ښايي په راتلونکو دوو میاشتو کې ترسره شي. د افغان او ترکمن لورو ترمنځ د ګازو د پېرلو په اړه هم هوکړې شوې، خو د ګاز بیه، د لېږد اندازه او د سوداګریزو پېرودونو د پیل کره نېټه لا نه ده روښانه شوې

د دې پروژې له مخې، ترکمن ګاز به د افغانستان له لارې پاکستان او هند ته ولېږدول شي. ټاپي شاوخوا ۱،۸۰۰ کیلومتره اوږد پایپ‌لاین دی او د بشپړېدو په صورت کې به په کال کې د شاوخوا ۳۳ میلیارده متره مکعب طبیعي ګاز د لېږد وړتیا ولري

د پلان له مخې، افغانستان به د دې ګاز یوه برخه ترلاسه کوي او تمه ده په هرات کې له دې انرژۍ څخه د صنعتي فابریکو، برېښناکوټونو او کورنیو د اړتیاوو لپاره استفاده وشي. د ګاز د وېش لپاره په هرات کې د اړینې شبکې د جوړولو چارې هم د افغان او ترکمن چارواکو ترمنځ د بحثونو برخه دي

سره له دې، د ټاپي د پروژې تر ټولو لویه موخه لا هم د پاکستان او هند بازارونو ته د ترکمنستان د ګازو رسول دي. د افغانستان له لارې د پایپ‌لاین د جنوبي برخو د پراختیا کره مهالوېش لا نه دی اعلان شوی، او د پاکستان او هند ته د ګازو د رسولو د پیل وخت هم لا روښانه نه دی

د ټاپي پروژه له نږدې درې لسیزو راهیسې د سیمې د انرژۍ او اقتصادي همکاریو له مهمو طرحو څخه ګڼل کېږي. د پروژې عملي کېدل به افغانستان ته د انرژۍ تر څنګ د ترانزیټ له لارې د عوایدو او د سیمه‌ییزو اقتصادي اړیکو د پراختیا زمینه هم برابره کړي