د افغانستان او ایران سوداګري نږدې دوو میلیارډ ډالرو ته رسېدلې

د طالبانو د حکومت د صنعت او سوداګرۍ وزارت اعلان کړی چې د افغانستان او ایران ترمنځ د سوداګرۍ ارزښت په ۱۴۰۴ لمریز کال د لومړیو اوو میاشتو کې یو میلیارد او ۹۲۱ میلیونو ډالرو ته رسېدلی دی. دا کچه د دواړو هېوادونو ترمنځ د سوداګریزو اړیکو د پراخېدو نښه بلل کېږي

اصلي توکي: تېل، خوړو مواد، ساختماني اجناس او صنعتي محصولات

د دغه وزارت د معلوماتو له مخې، د سوداګرۍ ډېره برخه تېل او نفتو توکو، د خوراکي موادو بیلابیل ډولونه، ساختماني مصالح او صنعتي محصولات جوړوي. د راپورونو پر بنسټ، د دواړو هېوادونو ترمنځ واردات او صادرات د تېر په پرتله په چټک صعودي حالت کې دي

له پاکستان سره د پولې تړل، د ایران لوری یې پیاوړی کړی

د افغانستان او پاکستان د تګ راتګ او سوداګرۍ پر لارو کې د وروستیو مرزیو بندښتونو او ترینګلتیاوو له امله د افغان سوداګرو پام ډېر په ایران ور اوښتی دی. د ټرانزیټي لارو د ګډوډ کېدو له کبله، د سوداګرۍ لویه برخه د ایران بندرونو او لارو ته اړول شوې ده، چې دا بدلون په ورځني سوداګریز جریان کې د پام وړ اغېز ښيي

سوداګرو: د ایران لاره باثباته، خو لګښت یې لوړ دی

یو شمېر افغان سوداګر وایي چې د ایران لاره که څه هم په امنیتي او اداري برخه کې نسبي ثبات لري، خو د ټرانزیټ او بندري خدماتو لګښتونه یې د پاکستان په پرتله لوړ دي. سره له دې، د هغوی په وینا، د پاکستان د پولې د دوامدارو ستونزو له کبله د ایران لوری اوس د بدیل په توګه اړین ګرځېدلی دی

لوړ اقتصادپوهان: د سیمې سیاسي وضعیت سوداګري بدلوي

اقتصادي شنونکي باور لري چې د سیمې سیاسي ترینګلتیاوې د افغانستان د سوداګریز توازن رُخ بدلوي. د پاکستان پر ځای د ایران د لارې پیاوړي کېدل ښيي چې د سیمه‌ ییزو اړیکو کوچني بدلونونه هم د افغانستان پر سوداګرۍ ژور اغېز لري